【騷價升值】尹詩沛感謝思捷豹哥提攜

李思捷孖單立文（豹哥）早前舉行的《今晚豹制李》演唱會完滿結束，當中有份演出的尹詩沛（Nicole）終於衝出電視機首踏台板，謝幕時淚灑舞台感謝思捷同豹哥提攜。

得前輩認同唱功

已於TVB當演員五年的Nicole首次上台難免心情緊張，全靠綵排時多位前輩大讚Nicole唱功了得，唱足全場三個鐘都無問題挽回信心：「當晚有好多TVB藝員同事、高層都有到場，演唱會完咗即刻收到好多同事whatsapp及電話祝賀，仲話日後一定要預埋我做騷，我忍唔住喊咗出嚟，好多謝思捷同豹哥畀機會我，今次除認識咗一班有實力嘅歌手及樂隊，最重要係得到好多同行前輩肯定我，證明努力係冇白費。」

差啲走光

問到演唱會最難忘經驗，Nicole直言因條裙太重故在演出時差啲走光：「演出時條裙不停下滑，好彩都識得執生，扮投入用手撳實心口位置唔畀條裙再跌落嚟，最後都成功力保冇走光。」對於今次表演成功，Nicole希望能將來有更多演出機會，可以作出更多不同嘗試。