娛樂專題：何佩珉唔怕受傷堅持做打女

「動若脫兔，靜如處子」正好用來形容無綫女藝員何佩珉（Mandy），習武近廿年的她武功高強，耍功夫時樣子Cool爆，不怕受傷捱苦，性格硬朗！但Mandy同樣是名Sweet爆的怕醜女生，擁有甜美笑臉，更自爆喜歡送DIY禮物及浪漫行沙灘！

無綫藝員何佩珉5歲開始學習蔡李佛，轉眼間已逾18年，2011年仍是學生時已在武術選秀節目《功夫新星》中贏得冠軍，足見潛力十足！近年她全力進軍演藝圈，在劇集《潮拜武當》中飾演開朗啞女「毛荳」，甚考演技，又在電影《辣警霸王花》中飾演Man爆女警，狠打連場，在銀幕中展露身手。

跑越野賽整裂骨膜

問到何以自小就選擇學武？Mandy說：「我細個就好好動，開頭想學芭蕾舞，但因為屋企喺屯門，附近得功夫興趣班，於是試玩咗，媽咪都話驚我生得可愛畀人蝦，於是想我學功夫傍身保護自己。（點解堅持學咁多年？）師傅會安排我哋去唔同地方表演，所以唔悶，而且好開心同志同道合嘅師兄弟姊妹齊齊打拚。（受過傷？）撞瘀打親一定有，但好彩冇咩大傷，最深刻係中二跑完越野賽，盆骨骨膜裂咗，要坐個幾兩個月輪椅。到真係入行，記得第一次返內地拍打戲，唔識就力周身損晒又拗柴，但我目標係做打女，能夠將自己嘅功夫放進鏡頭，係好開心！」

擇偶唔Like肌肉男

Mandy打功夫時硬淨Cool爆，但平日其實是位怕醜文靜姑娘，一樣擁有顆渴求浪漫的內心：「浪漫就個個女仔都鍾意，我都嚮往同另一半行沙灘、我鍾意寫心意卡同整DIY禮物畀身邊人，但暫時未有好多拍拖經驗。」問到擇像條件，身手了得的她喜歡運動男：「佢未必要識打功夫，但要欣賞呢樣嘢，我比較靜，希望佢多啲嘢講、有幽默感。（身形？）唔使太肌肉，又唔要太瘦，比較鍾意靈活鋼條型。（要靚仔？）似韓星李敏鎬就最理想！其實樣唔係最重要，我覺得心地好嘅人先係靚仔。」

後記：毛荳 VS 毛荳

專訪地點是一所寵物酒店，童心未泯的Mandy見到可愛狗仔即嚷着要合照，起初狗狗怕陌生未肯坐定定，Mandy耐心地逗牠們玩熱身，最搞笑是其中一隻狗仔的名字竟叫「毛荳」，與Mandy在劇集《潮拜武當》的角色撞名！當攝影師大叫：「毛荳！毛荳！望呢邊呀！」一人一犬即齊齊抬頭望鏡，場面超爆笑！