娛樂專題：陳婉婷靠實力上位堅拒性感

無綫藝人陳婉婷憑處境劇《愛‧回家2》彈出，Hebe自爆為演戲甘願放棄學業，早前更搏到盡在劇中以三點式上陣，不過保守的她堅決向性感路線「Say No」，但飾演醜角及奸角則絕無問題！

無綫近年出現藝員逃亡潮，但亦造就一班默默耕耘的新人上位，當中有演出《愛‧回家2》而成功入屋的陳婉婷。26歲的Hebe藉《TVB周刊Cover Girl 2011》選舉入行，她透露當時正站在升學或入娛樂圈的分叉口，但熱愛表演的她最後選擇放棄學業：「當時我係有機會升讀大學，但因為我好鍾意演戲，好想抓緊呢個演戲嘅機會，所以最後下決心報讀第25期藝員訓練班。無論係當時定依家，我都唔會對呢個決定後悔。」堅定走演員路的她感謝家人一直以來的支持，讓她可以無顧慮地發展演藝事業：「可能會有人覺得我有書唔讀好傻，但屋企人認為要活在當下，最緊要係可以做自己鍾意嘅嘢。佢哋一直都好支持我，曾經試過有親戚入院，佢哋怕影響我工作進度，等我做完嘢先講番畀我知，所以好感謝一路上有佢哋做我嘅最強後盾！」

全力以赴監製賞識

Hebe入行後曾參與多部電視劇，雖然只是小角色，但每次皆全力以赴：「好珍惜每個可以演戲嘅機會，所以無論戲份重唔重，都要做好自己本分演好啲！好似之前岑麗香喺《無雙譜》中一人分飾兩角，我有幸做佢嘅替身，同佢一齊拍劇。雖然我無緣出鏡，但我每次都有背熟台詞去拍，因為背熟台詞係演員嘅本分嚟！」如此敬業，難怪她獲得監製賞識，更在劇集《刀下留人》擔任要角：「監製話覺得我幾努力，所以畀咗好多機會我呢個新人去試，好多謝佢對我嘅賞識。最近我有份參與嘅劇集《刀下留人》，好幸運地戲份都幾重，都係監製畀機會我去做呢個角色，亦令我可以同其他前輩合作，喺佢哋身上學到好多嘢！」

三點式驚鴻一瞥

對演戲充滿熱誠的Hebe，願意為藝術犧牲「靚樣」做醜角，亦不介意演不討好的角色。問到早前她於《愛‧回家2》中演奸角「巫德舒」，她坦言劇集出街後有收到劣評：「其實唔少人話過我喺劇中對付龔嘉欣好衰，仲試過有人誤會我本身性格同劇中一樣咁差，初時收到呢啲評語當然會唔開心，但我安慰自己係演得夠放夠衰格，先會有人將我代入咗角色而走嚟話我，都係好事嚟！」而Hebe早前在劇中更有一閃而過的三點式畫面，她坦言是入行以來最性感的一次，雖然被網友讚身材火辣，但她卻謝絕性感路線：「我份人好保守，着三點式嘅次數五隻手指數得晒，仲要加多件外套先敢着。但因為劇情需要我着得咁性感，同埋導演講明呢一幕只係三秒鐘嘅鏡頭，所以我當日好安心咁拍。不過，三點式已經係我底線，我亦唔想行性感路線，他日再遇到有劇本需要我更加性感的話，我都要考慮吓！」

後記：讀寫障礙磨練意志

與「嬌滴滴」外表截然不同，性格堅強的Hebe談到小時候曾患有讀寫障礙，一直抱樂觀的心態去面對：「我細個有讀寫障礙，會容易將啲字掉轉嚟寫，例如英文字母bd及qp，所以要用更多方法，例如圖像記憶法記字。好多人見到我呢個情況，自然會覺得冇大學肯收我，但我唔鍾意放棄，所以好努力讀書先考到大學。我覺得有讀寫障礙未必係壞事，起碼養成我會放更多心機及時間去做每一件事，亦令我自覺去學定啲嘢傍身，正如平日有學功夫，之後演打女角色都會更易上手！」