苟芸慧珠海炒車一事學識活在當下

藝人苟芸慧接受電台訪問，講到她因甲狀腺問題引致近年身體暴脹，但最近終於成功修身，問到怎樣做到？她表示：「其實一路有Keep住抽血同食藥，但就好番得比較慢，到之前賽車反車出事，我嗰吓驚自己會冇命，就係呢件事令我改變諗法，覺得好多嘢應該要放下，做人要活在當下。我喺呢兩年有個要多謝人嘅list，多謝佢哋冇忘記過我，知道有啲嘢係要即刻做，所以出事後我就即刻約佢哋出嚟食飯多謝佢哋，不停約人食早餐、午餐同晚餐，用咗兩星期面對面多謝佢哋，發現嗰陣掛住多謝佢哋，唔記得咗抽血同食藥，醫生知道咗仲好嬲，點知抽完血之後，佢話點解我啲數字咁靚，之前畀人話肥所以唔敢食嘢，但嗰兩星期反而不停食就好番，依家都接近正常數字，但都要Keep住睇6個月。」

「連飲水都驚肥」

她亦講到之前為減肥，最盡試過十日唔食嘢：「連飲水都驚肥，嗰段時間好唔開心，仲要唔食都冇用，而且出嚟仲要畀人話，嗰段時間想完全休息，但溝通上有問題，不時又要出一出嚟見人，但依家學識做人要直接，以前會企喺人哋立場諗，但佢哋唔會知我感受，但依家就會學識即刻講我感受。」