陳展鵬恨拍拖　預告同鍾嘉欣過情人節

藝人陳展鵬現身電台接受薛家燕和范振鋒的節目訪問，透露在節目內大談感情事。講到情人節將至，展鵬透露當日會與鍾嘉欣到三藩市登台，講到他跟嘉欣曾傳緋聞，他笑言：「好多都傳過，不過傳傳吓又無疾而終。（覺得遺憾？）唔係，覺得ok喎，依家我又可以同佢去登台。（唔想傳傳吓修成正果咩？）咁我哋不嬲都係銀幕情侶咋麻。（但佢依家都單身？）唔知呀，但覺得可以一齊合作做嘢都幾好，今年就終於有，會一齊去拉斯維加斯同三藩市。（有冇時間玩？）我未必有時間，因為之後要即刻返嚟香港做嘢。」

趁過年登台搵銀

問到新年會怎樣過？展鵬則謂未知：「因為公司可能會有綜藝節目，睇吓到時使唔使拍。（你寧願放假定搵錢？）咁寧願搵錢呀，錢唔會夠，雖然拍劇都重要，但就成日霸咗啲時間登台，所以都希望趁節日做嘢可以儲吓錢買樓。（咁買樓定搵女朋友重要？）兩樣都緊要，最緊要健康。（你都想拍拖？）想！我都有需要㗎麻，男女拍拖都好正常，唔通做和尚咩？一出世就想拍拖。（好耐冇拍拖？）都dry咗好多年，都數唔到幾耐。（媽咪有冇催你拍拖？）唔會催嘅。（佢有冇介紹女仔畀你？介唔介意相睇？）做過朋友，OK嘅，但唔好講明係相睇，話出嚟食個飯識新朋友就ok嘅。（試過出嚟食飯但多咗個唔識嘅女仔？）成日都係，唔係媽咪嘅朋友，只係通常食飯唔會問朋友有邊個去。（冇個合眼緣？）要求唔高，只係未啱眼緣。（有咩要求？）舒服。（你個舒服都好高要求？）係，好麻煩，緣分嘅嘢好難講。」