小儀認「翻撻」　金剛：佢對我不嬲有感覺

藝人金剛被傳與阮小儀「翻撻」，小儀更因Dry足5年而患上抑鬱。二人齊齊錄影無綫節目《Sunday好戲王》，影合照時全無芥蒂，拍檔陳智燊更在旁起哄：「咀佢。」

同小儀冇可能

小儀以生病為由拒絕受訪，她向記者拋下一句：「我係同金剛『翻撻』…我唔係抑鬱，係躁狂呀！」反觀金剛面對緋聞態度則截然不同，他笑說：「佢對我不嬲有感覺，不過依家我唔係單身嘛。（話你畀女飛喎。）不可能。其實我同小儀都係舊聞啦，又翻炒？聽到都好笑。（如果你冇女友會否考慮佢？）雖然我個人好，但唔夠佛心。我同佢感情交流幾好，心靈上係好朋友，但身體方面做唔到好朋友囉。小儀係我凍齡女神，唔敢高攀！（女友有冇就緋聞問你？）佢一睇就知…假，佢同小儀都好熟，總之我同小儀都唔係對方喜歡嘅類型。」

爆小儀冧彭于晏

問到金剛可會介紹男生給小儀？他抵死謂：「佢鍾意靚仔喎，但如果你係彭于晏，你會唔會揀佢吖？（講起你哋緋聞時，小儀發爛。）唔會嘅，可能佢唔係幾舒服，而且四十幾歲人，係咁喇。（有傳佢抑鬱。）冇可能，佢咁樂天。」

志偉為工作周圍飛

而同場的曾志偉剛由台灣回來，他表示：「拍戲呀，套戲叫《健忘村》，大製作，2017年賀歲片，同舒淇、張孝全合作，我演大反派。」志偉笑言近半年頻遊飛機河：「都冇時間喺香港，白交咗半年租，淨係畀菲傭住。（收爐喇？）差唔多，不過好快去拉斯為加斯登台，又開爐喇。」