港姐陳凱琳出席活動時，喜獲大會送上耳環，並坦言喜歡設計簡約的首飾。問到會否叫男友鄭嘉穎掃貨？她笑言：「自己入貨，自己買。（有冇收過嘉穎送嘅首飾？）收過一次。（戒指？）唔講啦，係一齊揀嘅，畀驚喜固然開心，但一齊揀就一定啱心水。（佢送嘅嘢啱唔啱？）啱，佢好了解我鍾意乜。（幾時收戒指？）戒指都可以唔同場合，唔一定係你哋講嗰啲（結婚）。（收過？）唔一定結婚先收。（即係收過未？）唔講有冇收過，唔一定去到咁extreme。（拍拖紀念收戒指？）冇，我哋紀念日冇咩。」

學整蘿蔔糕拜年

而提到情人節，陳凱琳坦言尚未準備禮物，加上男友嘉穎屆時可能不在港，故要提前吃飯慶祝。另外，將到嘉穎家拜年的她，坦言會準備禮物給對方家人。問到她會否下廚？她說：「我想學整蘿蔔糕，一來好似多啲愛心，二來可以放自己鍾意嘅料，今年應該會同朋友一齊學。（嘉穎同鄭媽媽都有份試？）如果成功會畀，但我會自己做咗白老鼠先，唔好食就唔會畀。」