藝人岑麗香（香香）、苑瓊丹（苑仔）及陳煒等，於尖沙咀出席無綫新劇《火線下的江湖大佬》的團年晚宴。當中苑仔自爆經常把香香的男友強強掛在嘴邊，香香受訪時笑言經常被苑仔「威脅」搶男友：「佢要我乖，唔乖就會提起強強，仲威脅我要勾引強強，所以要聽晒佢話。（苑仔有見過男友？）喺相同報紙見過，其實都係攞嚟玩，開玩笑！」

代男友保管利是

提到新年安排，香香笑言若媽媽封利是給男友，會幫對方先行保管：「我會留港逗利是。（媽媽封利是畀男友？）睇吓媽咪封唔封，有的話當然幫佢袋！」她又稱新年會與陳煒等開工補拍戲份：「我期待開工向佢哋逗利是，練定恭賀說話！（幫男友逗埋？）得唔得㗎？不過做人唔可以咁貪心！」

準備神秘情人節禮物

香香又透露正準備神秘禮物與男友慶祝情人節：「到時我喺香港，佢喺溫哥華。（分隔兩地？）後補畀大家。（寄禮物？）諗緊，準備緊秘密禮物！」