洪杰爆朱亞琳扮惡女太溫柔

歌手洪杰（Alex）曾在大師姐容祖兒的音樂會上與對方合唱了一首《煙霞》，被大家認為他唱起女性歌曲時有另一番韻味，所以公司就開始為他籌備推出翻唱EP。即將派台的歌曲為翻唱張惠妹的《如果你也聽說》，歌曲原意是講述女方分手後質問前男友的歌，現在Alex卻要反過來用前度角色向女方說自己非常思念對方，他說：「有趣嘅係原來啲歌詞掉番轉一樣成理，唯一唔同係我唔可以聲嘶力竭去唱，要好似講道理咁講出自己難處嘅心情去唱。」

戥朱亞琳奪華姐冠軍開心

去年12月Alex有幸擔任「溫哥華華裔小姐競選2015」的表演嘉賓，見證華裔小姐朱亞琳（Jennifer）奪冠，當他在溫哥華拍攝唱片封套及MV時，亦順道邀請Jennifer擔任其中一首MV的女主角。Jennifer之前來港參選國際中華小姐並贏得冠軍，Alex亦戥對方開心，笑言要一沾Jennifer的旺氣，希望新歌得到好成績。

演情侶互攬取暖

在MV中，二人要演繹一對由熱戀、發生爭吵到最後分開的情侶。首次參與MV拍攝的Jennifer坦言穫益良多，而最具挑戰的是要對初相識的Alex發脾氣，每次導演要Jennifer擺出惡樣，都被嫌表情太溫柔，更笑她的「溫柔底」非常難改！Alex說：「今次MV要一日內經歷一段關係嘅種種變化，好彩溫哥華夠凍，扮好Sweet嘅時候大家親近啲，可以互相取暖，下一秒要冷戰諗番有幾凍就得！雖然Jennifer係新人，但佢好用心去參與，令我同工作團隊印象好深，應記一功！」