朱慧敏熱愛新年 爆他鄉過年孤單到喊

20160205
東網電視
更多新聞短片
朱慧敏着上中國傳統服飾旗袍向大家拜個早年。

藝人朱慧敏(Queenie)日前穿上中國傳統服飾旗袍向大家拜個早年,她表示因受外婆影響而愛上傳統服飾,又指自己每年均會跟隨習俗大掃除:「我好鍾意送舊迎新,主要都係清潔吓屋企,但如果有啲衣物唔要我會送畀朋友,或者捐出去畀慈善團體幫助有需要嘅人。我有畀過工人姐姐或者佢嘅姊妹,佢哋都好開心,又可以送返去印尼。亦會同拍劇嘅同事聯繫住,大家會互相分享最近有冇啲衣物、首飾唔要,影張相上Group睇吓有邊個啱就帶返公司交收,依家都唔會話咩着人哋啲舊嘢,只係用得唔好嘥,啲嘢只要保存得好其實唔會睇得出係舊。」

寧唔開工都要拜年

自認思想傳統的Queenie亦直言寧願唔開工,都要抽時間拜年:「我好鍾意過年,就算初一、二、三真係要工作唔喺香港,我都一定會提早拜又或者初四、五去拜,唔係我就寧願開少日工都去拜年!而屋企一直有個習俗係煮鹹湯丸,因為婆婆係東莞人,佢會用糯米粉搓成一粒一粒無涵嘅湯丸,整個有雞、乾瑤柱、蝦米、黃芽白、冬菇同瘦肉煲到好香濃嘅湯底,最後就放番啲鹹湯丸入去,呢個就係屋企每年會食嘅家鄉食品。另外每逢新年我都會放盤桔喺屋企,亦會插啲色彩繽紛嘅花,令屋企好有氣氛,過完年就會將啲桔仔摘落嚟要嚟浸鹹柑桔,對身體又好,一舉兩得!」

他鄉體驗「每逢佳節倍思親」

回想18歲時到美國留學,Queenie坦言在他鄉過年令她感到十分孤單,更因思鄉流過眼淚:「初初第一年去到,個農曆新年真係好難忘,覺得自己好淒涼!我喺西雅圖讀書,都有華人區、唐人街,但就冇紐約、洛杉磯嗰啲咁大型,我阿姨喺嗰邊,亦有啲同學係香港人,會一齊去唐人街飲茶,不過呢啲已經係第二、三年開始識多咗朋友嘅新年活動,第一年真係有喊,完全感受到咩叫『每逢佳節倍思親』!我自己一個人,嗰邊又凍又落雪,亦都冇農曆年假期,大家都係照常返學放學,但當我一打返嚟香港同屋企人拜年,成家人好開心又打牌又食飯,我就孤零零對住部電腦做功課,當時忍住淚水同啲親戚逐個逐個拜年,一收線就忍唔住喊,因為真係好掛住屋企!不過對我嚟講都係一個好好嘅經驗,令我更加珍惜朋友同屋企人,亦令我特別鍾意過節。」

場地:Mira Moon Hotel
化妝:Kitson Yu@Portfolio
服裝:Yi-Ming

最強娛樂APP《東網巨星》,除咗特備遊戲節目《巨星放題》外,每個禮拜都仲有好多其他精彩娛樂節目。如果鍾意韓風嘅,集中介紹最新韓劇、韓片同韓國最新歌曲嘅《韓劇榜》,同埋Highlight每周韓星訪港精彩片段,以及報道韓國演藝圈最新動態嘅《韓風吹》絕對啱晒你。仲諗咩呀!快啲Download啦!
最強娛樂APP「東網巨星」下載連結:
 http://on.cc/redirect/entertainment