陳展鵬孖又南去旺角幫「二奶」扮靚

39歲的陳展鵬近年事業起飛，感情方面卻乏善可陳，早年和亞姐姚佳雯甩拖後，傳來傳去都只有緋聞，雖然他曾公開暗示有拖拍，向記者表示「可能已經出現咗呢」，亦有讀者爆料指見他與一名女子於鯉魚門拍拖，不過一日未正式公開「煎Pan嫂」正印地位，展鵬依然過住Dry爆生活，不過愛車如命的他向來視愛驅如「二奶」，日前他約埋黃又南兩支公前往整車，幫「二奶」扮靚靚。

當晚7時許，展鵬與又南分別駕車到旺角，一前一後將座駕停泊在路邊後下車，步入一間車行。未幾，職員跟隨他們步出，揭開兩人愛驅的車頭冚，逐一研究零件，似有意改裝車的又南和展鵬，細心聆聽師傅指點。

雞啄唔斷地傾車經

期間展鵬意見多多，與師傅雞啄唔斷地傾車經，一時雙手插袋，一時翹晒手，期間多名職員出動，拿起工具幫他檢查「二奶」的狀態，傾得興起時，原本與職員在另一邊討論換車頭燈的又南亦加入戰團，一行人講車講到唔願走。及後展鵬搞掂自己架車，又走去八卦又南的車頭燈，最終又南只是換了兩盞燈，而展鵬只整了少許「鬼面罩」，但竟搞足個多兩個鐘，唔係車癡真係好難明白！