林峯怕開騷虛脫狂操體能

歌手林峯將於四月尾假紅館舉行《Heart Attack LF Live In HK 林峯演唱會》，現時他先集中操練體能：「每次演唱會我最驚第一Part，因為未warm up，唔敢用太多力，心跳會由正常70、80突然飆到150，但跟住又要即刻唱歌，心臟突然好唔適應，所以通常第一Part落到下面我就好似虛脫咁，尤其是第一晚，但跟住第二Part就冇事，所以希望今次體能會再好啲。」另外，講到個人生活，林峯坦言現時工作和工作之間會盡量抽空去旅行：「其實旅行真係唔係為咗玩，係為咗吸收人哋文化，全世界仲有咁多地方未去，我希望可以喺50歲前盡可能去得幾多得幾多，因為年長咗，好多嘢未必做到，例如我去旅行係可能玩足幾個鐘獨木舟，如果過咗幾廿年，呢樣嘢仲點玩？」