小周周七個月已識嗌阿爸　昆凌放心晒

天王周杰倫（周董）同老婆昆凌去年7月誕下囡囡「小周周」Hathaway，轉眼間小周周已經約7個月大，估唔到咁快已經識講嘢喇！

啱啱昆凌喺社交平台上載咗一段黑白得字幕嘅短片兼留言：「最近hathaway 一直pu~pu 噴口水～～ 哈哈被我猜對了～先叫爸爸！媽咪我要放假了！」短片中傳來BB話之餘，仲好清晰聽到「阿爸」兩個字，原來小周周第一個識叫嘅係爸爸！

其實早前昆凌出席活動時，都講過希望囡囡識叫爸爸先，因為咁樣第時喊嗰陣就會叫爸爸先！難怪昆凌都喺段片好風騷咁話自己估啱咗之餘，仲話自己可以放假啦！另外，除咗昆凌好開心之外，啲網友都好激動，條片上載咗短短20分鐘，瀏覽次數已經高達5萬！