唐紫睿公布戀情 男友包電車過情人節

20160214
東網電視
更多新聞短片
唐紫睿選擇喺情人節公布戀情呀。
現年28歲的「晶女郎」唐紫睿(Hazel)公開戀情喇!喺情人情晚上,佢上載咗同任職室內設計師嘅圈外男友Louis「愛的抱抱」合照,同時又大晒鑽戒同心心蛋糕相,仲留言話:「我突然好想哭……」一眾粉絲睇到紛紛留言恭喜佢,唔通Hazel真係要「閃婚」?!
《東網》記者梗係即刻致電當事人,恭喜Hazel啦,不過佢就話:「唔係求婚,只係情人節禮物啫!」原來只係一個美麗的誤會,聽到呢度,一班宅男粉絲應該都安落晒。
激讚男友
對於拍拖兩個月左右嘅新歡Louis,Hazel真係讚口不絶,除咗送佢一對珍珠耳環、夾埋有半卡嘅碎鑽戒指外,呢位L先生仲親自整蛋糕同畫送畀佢,最最最…有心思係book咗架叮叮,車上更掛上93張一對「新人」嘅合照,真係羡煞旁人呀!Hazel又冧爆分享男友今晚嘅浪漫驚喜過程:「佢約咗我食飯,叫我七點幾喺電車站等佢,本來等咗佢半個鐘,仲諗住鬧佢,打算走㗎喇,突然有架叮叮嚟到,佢嗌我先知佢book咗架叮叮。我哋拍拖兩個月,佢不停叫我影相,原來係為咗設計今日嘅情人節,好感動,所以我決定公開。」
有諗過結婚
收到鑽戒一刻唔知佢又有冇誤以為求婚呢?Hazel笑謂:「一見到電車就嚇呆咗,嗰刻好想喊,但我忍住,因為我驚個妝花,其實嗰下知佢心意,但大家未係時候。(有冇結婚打算?)同佢好夾,我都有諗,但依家熱戀期,我都唔知,慢慢再睇吓啦。(唔介意閃婚?)依家未係時候,事業啱啱先起步,但唔覺得閃婚係大問題。」
Hazel今次真係戀愛大過天,未經公司許可就公開戀情,佢都話唔知老闆、同事有乜反應,但佢話:「算啦,唔理喇。(公司畀拍拖?)我見師兄(何浩文)都係咁,所以我諗勤力啲做嘢,拍拖都唔緊要嘅。」並謂跟男友打算穩定交往才公開,雖然擔心粉絲會流失,但自言會「將勤補拙」。
最強娛樂APP《東網巨星》,除咗特備遊戲節目《巨星放題》外,每個禮拜都仲有好多其他精彩娛樂節目。預知未來,相信好多人都希望做到,《東網巨星》APP其中一個重點節目《玄學星相》,除咗教識大家點樣催吉避凶,仲會以玄學角度,幫大家八盡每周娛樂熱話㗎!
最強娛樂APP「東網巨星」下載連結: