藝人黃宗澤（Bosco）出席劇集《警犬巴打》宣傳活動，身穿鮮紫色褸的他好應節，透露趁新春假期留在家中陪伴母親，還做廿四孝兒子到街市買餸，結果獲檔主半送半賣，認真開心！

情人節唔需要情人

談到早前不慎跣倒弄導至肋骨有裂痕，Bosco表示醫生也未能估計康復時間，但感覺原情況良好，還自嘲考慮家中安裝了平安鐘：「之前落床不知幾痛，諗番都好戇居，因為浴室個防滑墊太耐冇換，我一踩落去咪成個人跣到。（有冇着衫？）沖完涼囉，半夜三更唔通赤條條叫阿媽咩，邊度跌倒就邊度起番身。（係咪覺得有另一半好啲？）我要一個平安鐘多啲！」而情人節他就與家中、母親撐枱腳，對於過寂莫情人節，Bosco笑謂：「仲咩啫！又唔係第一次，咁都唔一定情人節先慶祝嘅。」

望買間屋送畀自己

對於股市近日有狂跌，Bosco表示沒有買股票，但有買樓投資。問會否趁樓市跌入市？他謂：「未知，之前買咗間屋畀媽咪就剛剛收樓，過年後就開始裝修，我都想買番間畀自己，最好同媽咪樓上樓下，因為自己太多衫唔夠地方擺。」