41歲徐濠縈有喜 Eason戒煙貼身服侍

20160219
東網電視
更多新聞短片
41歲徐濠縈追B成功,真係恭喜恭喜!
歌神陳奕迅(Eason)一直想太座徐濠縈為他湊夠「好」字,想不到剛於新年前搬入壽臣山2.3億風水屋後,即帶來喜訊,據知下月便滿42歲的阿徐相隔11年後,再次Bingo造人成功,現已懷有一個多月身孕!
阿徐曾表示若懷孕就會暫停跑步,言出必行,早前絕迹渣打馬拉松,並變成「大食積」口唔停。連日來Eason化身阿四,管接管送老婆四出覓食,只見阿徐不再穿Slim Fit靚衫,反而闊袍大袖,面腫腫之餘,更巨躉初現,行路時還撐着腰就住行。老婆有喜,Eason極之緊張,還鮮有為阿徐開車門有如貼身侍衞,平日煙不離手的他更為新生命來臨戒煙,做個健康爸爸!
闊袍大袖現身
徐濠縈出名是「Fashion精」,就算普通行街都定必Slim Fit靚靚上陣,可是近日她不只改穿闊袍大袖,連面容五官也開始浮腫。上周四(本月11日)過了晚飯時間,Eason親自揸車送阿徐到跑馬地一家日本餐廳,阿徐落車步入餐廳時放慢而行,見她身穿鬆身工人褲,平日在社交網晒收到不少化妝品的她更鮮有地素顏出街,看來不想撻太多化妝上面,影響健康。
就算生完女兒康堤後,阿徐都一直保持苗條身形,可是當晚見她現巨躉,腰肢粗壯,行路時撐着腰就住就住,漸見孕味,她入餐廳買完外賣,也沒有像平日健步如飛,拿着兩袋外賣龜速上車,她上車時笑容滿面,明顯心情大靚。見時間不早,老婆又肚餓,身為「柴可夫」的Eason也沒有左兜右兜,直駛壽臣山寓所。
連日素顏
阿徐有「肯亞徐」之稱,走得快過Eason,但連日所見,Eason全天候緊貼服侍太座,變成「E神侍衞」,寸步不離。翌日(本月12日)下午1時,Eason和阿徐又再孖咇出動食好嘢,兩公婆從寓所出發駛往灣仔月街,相約兩名友人歎越南菜。相隔一日,阿徐着得更寬鬆,穿上粉紅色鬆身衫及闊褲的她又再素顏上陣,孕味更濃。落車行去餐廳時,她撐着腰步履更見緩慢,當日天氣不算太冷,她都穿上外套以免着涼。其後Eason泊好車上前會合,見他一臉鬍鬚,不修邊幅,看來是為「湊」老婆而勞心。
食唔停口
在餐廳外等枱時,有Fans認出Eason夫婦,Eason即着阿徐先入餐廳,以免她企得攰,然後發揮「吹神」本色,跟Fans傾幾句外,又握手多謝支持,吹完一輪才入內醫肚。用膳期間,Eason講多過食,反而阿徐大啖大啖大快朵頤,四人一食便兩粒鐘,吃飯後阿徐更見肚凸凸,跟友人道別後,Eason細心傍實老婆,恩愛到痹,然後揸車前往跑馬地方向。
來到跑馬地銀行附近,Eason停車,特意為阿徐開車門,又細心從後護住老婆,不停叮囑阿徐要小心,然後讓她揸車離開,自己則到銀行辦理財務事宜,阿徐也自行揸車返回寓所。
馬拉松No Show
11年前阿徐為Eason誕下女兒康堤後求B多年,下月7日阿徐便滿42歲,梗想標尾會湊夠一個「好」字。阿徐向來跑得,到世界各地出戰過不少馬拉松賽事,但去年曾表示若然懷孕就不會跑步,今年1月香港馬拉松賽事,竟然連人影都冇,知情人士說:「阿徐近日冇跑喇!佢原本有報10公里賽事,點知都冇參加,大家都覺得奇怪,近排又見佢日食夜食,都估佢係咪真係有喜。」
Eason前年豪擲2.3億購入壽臣山豪宅Shouson Peak,去年7月已想搬入上址,可是最後裝修一年有多,新年前才舉家搬入新居,想不到搬入風水屋,即傳來阿徐有喜消息,不但旺Eason事業,更旺埋丁,據知阿徐如今有一個多月身孕,為怕小器,故絕不宣揚。
工作空檔陪到實
阿徐曾說要生B首要條件是Eason立即戒煙,可是他之前戒極都戒唔甩,但傳宗接代何奇大事,老婆落得柯打,Eason當然遵命,近月更已戒煙成功,連日來一支煙都冇見他點過,一切以老婆和腹中BB行先,知情人士說:「Eason喺2月底先去巡唱,就趁呢段時間同老婆陪飲陪食,平日大細路咁,估唔到因為小生命連煙都戒埋,若再做老竇,做老婆阿四當然冇問題啦!」
與Eason搬入風水屋的還有阿徐心愛的唐狗,平日阿徐不時放抱狗狗照上社交網開心Share,但現時「粗身大勢」,她也不方便帶愛犬出入,即使愛犬睇獸醫,亦惟有勞煩工人由司機車去寵物診所。而身為阿徐的狗狗亦零舍矜貴,全程由工人抱實,行都唔使行。
風水獨立屋主人房好旺財氣
Eason以2.3億買入Shouson Peak,屬南區的壽臣山道,一向都人傑地靈,堪輿學家陳子才表示Eason獨立屋坐北向南,坐向旺丁不旺財,但其主人房則財氣十足,獨立屋與Eason時辰八字亦十分夾,故Eason搵錢能力絕對冇問題:「佢同徐濠縈喺今年命格上都見到有天喜星,代表容易有喜事,生仔機會都大。而南區向來都旺財,佢哋主人房係好旺財氣,所以搵錢係無問題!(間屋係咪好夾佢哋?)完全好夾,Eason五行屬土,主人房正北,依家佢住獨立屋,代表可以拎到更多財氣,財氣比之前更加旺盛。(有幾夾?)如果100分滿分嘅話,都有80分。」
而壽臣山道一向受圈中人愛戴,因環境清幽及私隱度夠高,除有陳奕迅居住外,歌手李克勤為方便一對兒子上學,2012年豪擲半億買入位於港島南區壽臣山道的複式新居,更豪花500萬裝修。而鍾情港島區豪宅的關之琳,2010年以公司名義以約1.4億買入壽臣山道東一號洋房。鍾鎮濤則在1997年以4,600萬買入壽臣山朗松居,但已出售。
最強娛樂APP《東網巨星》,除咗特備遊戲節目《巨星放題》外,每個禮拜都仲有好多其他精彩娛樂節目。如果鍾意韓風嘅,集中介紹最新韓劇、韓片同韓國最新歌曲嘅《韓劇榜》,同埋Highlight每周韓星訪港精彩片段,以及報道韓國演藝圈最新動態嘅《韓風吹》絕對啱晒你。仲諗咩呀!快啲Download啦!
最強娛樂APP「東網巨星」下載連結: