粉絲唔肯走！黃宗澤焗送「愛的抱抱」

藝人黃宗澤、朱千雪、陸永等齊齊出席《警犬巴打》宣傳活動，與台下粉絲互動時，有內地女遊客獲邀上台後不肯離開，原來是等黃宗澤「愛的抱抱」，而朱千雪則揀中一名婆婆玩遊戲並贏得金猴，令對方開心爆燈，可謂皆大歡喜！

有慰問王浩信

黃宗澤直言近日忙於拍攝新劇《幕後玩家》，有與拍戲受傷的王浩信通過電話，得知對方無大礙：「拍戲整傷會有，未試過佢咁嚴重。（最傷嗰次係點？）拍《黃飛鴻》打戲時成個人橫腰貼咗喺門檻度唔郁得，我真係喊咗出嚟，後嚟唐佳師傅攞藥酒嚟救我。（攞番個女友幫你搽藥酒？）我成日開工又周圍飛，搵女友嘅話，對方一定要好獨立，都係搵跌打醫師易啲。」

陸永被抽得金猴

陸永被劇中狗演員Brother抽中得金猴，他開心表示：「我冇抽獎命，今次第一次，不過個個叫我請食飯，相信食麥當當我都要蝕。」由於早前主持玄學節目，幾位高人都指他開始行運，令他雀躍不已。

朱千雪認黐身女友

至於朱千雪竟不知有元宵節這回事，問到她可想拍拖？她笑謂：「有咪拍囉。（黃宗澤啱你？佢要搵獨立型。）咁唔得嘞，我好黐身！」