周麗淇自爆險死經歷：嘴唇發紫個人脹晒

周麗淇出席慈善活動，她表示自己於2015年最後一個Job和2016年第一個Job都是為慈善的，今年她都會參與多些慈善工作，包括到內地的山區探訪。問到她慈善探訪最難忘的經歷，她說：「有一次最難忘係自己差啲連命都冇，嗰次去咗印度探訪，幫當地啲小朋友籌款，因為係海拔高嘅地方，我有高山反應。我事前有做足準備，去到又行得好慢咁，到埗當日沖咗個涼，原來唔可以喺第一日沖涼，我直情係唔知道，冇人提我。沖涼會令血氣運行，沖完之後我好暈，要打針食藥，驚自己會唔會死，去幫人點知要人幫番我，啲醫生要照顧我，嗰刻我嘴唇發紫，啲氣壓令到我個人脹晒，好驚，未試過咁樣，死咗半咁。（夠唔夠膽再去？）嗰個地方可能差啲，有啲危險，要衡量吓自己能力，唔知第一日唔沖涼會唔會無事。可能要揀地方去，唔適合去啲海拔高嘅地方。（探訪有冇試過喊？）不嬲唔會喺佢哋面前喊，背後就會，如果喊可能佢哋會覺得佢哋好慘。」她又透露今年會以私人性質在港探訪智障人士，事前需要上堂接受訓練。