滿意身形　濱崎步恨着內衣開騷

日本樂壇天后濱崎步（Ayumi）早前為內衣品牌拍攝了一輯性感宣傳照，她與丈夫一起於銅鑼灣出席該品牌活動，吸引了數十粉絲和途人在店外圍觀。

以一身黑色性感造型示人的Ayumi，被問到覺得品牌的店舖怎樣，她說：「呢度就好似係所有女仔嘅夢境一樣，我覺得自己好似灰姑娘。我今日着呢件衫，係我之前shooting入面最鍾意嘅一件，我想着住佢嚟演出我個騷，想下一個騷着，或者可以為我度身訂造。」

愛儲內衣

問到步姐拍攝該輯性感宣傳照時有何感覺，她續說：「我係第一次影啲咁性感嘅相，作為日本人係太性感，不過why not？真係好靚同好wonderful。（有咩工作計劃？）我嘅巡迴演唱會將會喺今年5月開騷，叫做《Made in Japan》。（你係咪性感內衣嘅擁躉？）我係，我有好多呢個品牌嘅collection。（老公都好欣賞？）你問番佢。我想喺我個巡唱度着住呢啲內衣。」

恨設計內衣

步姐又指她尚會在香港逗留多一天，問她想去哪兒，她反問記者謂：「有邊度好去？我尋晚去咗我最鍾意嘅海鮮餐館食辣蟹，好家庭式嘅style，好amazing。（想唔想設計自己嘅內衣？）我想呀。（想唔想有自己嘅內衣品牌？）呢個品牌嘅內衣好amazing。（係咪好滿意自己嘅身材？）係呀。」訪問完畢後，步姐更應記者要求一起selfie，以及跟場內傳媒大合照，表現友善又親民。