娛樂專題:唐詩詠靠走位做絕世好女友

20160225
東網電視
更多新聞短片
唐詩詠不愛與伴侶嗌交,認為做人要學識走位相讓。
現年34歲的唐詩詠邁進入行第13年,面對「有線幫」和「港姐幫」等新人輩出,身經百戰的她卻未驚過,認為最重要是裝備好自己。經過一眾前輩多年來的演技洗禮,面對「劇界新仔」男友洪永城(Tony),詩詠則以「愛的鼓勵」引領對方:「我會同佢行每一步!」不批評、不吵架的她又教曉「港女」,兩人相處最緊要識得走位,「贏場交輸頭家」值得嗎?如此體貼、明事理,難怪獲網民封為「絕世好女友」!
想做八婆
多年來,憑劇集《天幕下的戀人》、《真相》、《大藥坊》等入圍「最佳女配角」,可惜每次詩詠都與獎項擦身而過,最終於2010年勇奪「飛躍進步女藝員」,後更獲古天樂欽點拍電影《逃出生天》。演技漸漸獲外界肯定,她坦言以「視后」為目標,又盼演出不同角色。
「其中一個目標係攞視后,另外我好想有一套代表作,但呢啲好講劇本、整體配合,可遇不可求。好多角色我都想做,最想演『八婆』、好姣嘅角色,好多人問:『你做到咩?』點解唔得?其實個個都有『八婆』一面,我同女仔朋友一齊嘅時候,多數會挑剔其他人嘅衣着,我覺得挑剔並非唔好嘅事,最重要係你個心態,有時『挑剔』係提醒緊對方,我覺得要學識善意挑剔。我都冇演過小三角色,好想試吓,性感我都得㗎,除剩個bra我都得,哈哈,不過都要睇番個劇本,如果正常劇情的話,三點式……都試吓啦!至於拍床戲,我同任何人拍都得,馬國明都得,但同Tony……佢個樣咁搞笑,唔好啦,件事好唔認真咁。」
順得女友
詩詠於無綫劇《鐵馬戰車》中,跟袁偉豪扮演鬥氣冤家,兩人經常鬥嘴、互相挑剔。不過,私下的她卻不喜歡吵架,工作上,固執的她也會據理力爭,愛情上,原來是個「順得」女友!
「現實中,我唔係好鍾意嗌交,因為我個性冇咁挑剔,我覺得有道理就會贏,通常嗌交我都講道理,有好多理論、會理性分析,所以好多時嗌完,對方就會話:『得啦,好啦,你贏啦。』真理就會喺我嗰邊。我同Tony好少嗌交,會就一件事去討論,雖然金牛座都係好固執、執着,但私下同處理工作又好唔同,兩個人相處時,有時唔係贏就代表好,大家嘅關係、感覺最重要,有時讓一次、退一步,我覺得呢啲係必須嘅。工作上,好理性去分析一件事係OK,但愛情係冇理性嘅分析,選擇另一半最緊要遷就,一凹一凸,一定要識得走位。」
裝備自己
即將踏入出道13年,詩詠曾為多套劇集《拳王》、《鐵馬尋橋》、《神探哥倫布》等擔任重要角色。直至近年,不少後起之秀冒出,好似「有線幫」黃翠如、李佳芯、梁嘉琪,「港姐幫」陳凱琳、蔡思貝、朱千雪等,正所謂「長江後浪推前浪」,淡定的她卻從容面對。
「我覺得(新人輩出)好正常,亦都唔需要理會,演員都係做番自己,唔需要理人哋,驚就表示對自己冇信心。我覺得公司係要畀好多機會佢哋,最重要係裝備好自己,冇理由有啲狀況出咗嚟嘅時候,你淨係掛住去埋怨一啲事。你準備好去做每一個工作嘅時候,你做得好人哋就會睇得到,如果你miss咗呢樣嘢,淨係掛住諗點解,好多嘢就會流走。生活開心最緊要,人生一定有好多際遇,我覺得自己一定要堅定。好記得頭六年冇停過,每年都拍足四套劇,試過做到好迷惘,做咗好耐都係一類角色,唔識去消化,當時陳國邦幫咗我好多,好多演戲上嘅嘢,我都會不停問佢點做,佢喺好多階段點醒咗我。」
野心勃勃向外闖
近期不少花旦小生向外闖,對演戲甚有野心的詩詠也不例外,雖然她自稱跟無綫還有一段時間合約,但直言貪心地想於電影、電視、舞台劇發展!不過,詩詠表示三個範疇都有不同要求,認為要同時進行也非常困難,並謂:「我覺得拍電影好有挑戰,好想不停有機會試,其實幫我入電影嘅係谷德昭,佢搵過我好多次,但每次都撞期,我好想拍佢嘅喜劇,即使客串都可以試吓。」