娛樂專題：陳浩民爆當初冇諗過娶蔣麗莎

陳浩民五年前自稱「掂一掂」長沙姑娘蔣麗莎（Lisa），自此成為「多仔公」，Lisa現更為陳家懷有第四胎。可是為一張床位紙已搞到浩民一家煩到震：「我哋唔可以有咗BB一個月就可以攞床位紙，床位紙要4萬擺喺醫院做按金，大吉利是個BB冇咗咁點算！」浩民說時略帶激動，撫摸太太腹大便便的肚皮，他現在要做的就是為Lisa申請單程證，一勞永逸！

一場中港婚姻，令以往貪玩的陳浩民修心養性，拚命返內地搵錢，為的就是令太太Lisa和三個「化骨龍」生活更舒適，如今Lisa又有喜，可是仍未有香港身份證，出入境的問題令他們十級困擾，兩人說時充滿無奈。浩民說：「呢一胎終於攞咗床位紙，Lisa依家可以自由出入境。其實攞床位紙真係幾麻煩，首先香港人同內地人結婚喺內地註冊，如果想喺香港生BB，啲程序非常繁複！」

懷胎十月，對孕婦來說充滿風險，浩民和Lisa覺得床位紙並非話攞就攞，所以這四胎在香港生，實在生得不容易，浩民說：「我哋唔可以有咗BB一個月就可以攞床位紙，床位紙要4萬擺喺醫院做按金，大吉利是個BB冇咗咁點算！冇理由未穩定就去攞床位紙，起碼等到六個月Firm到BB健康，驗晒血、照晒4D先去攞紙。咁樣中間就會出現時間差，佗到第四、五個月就會見肚，如果呢段時間出入境又未攞紙，就可能會被拒入境。」

無奈．眼泛淚光

為免麻煩，浩民已為Lisa申請單程證，不過一日未批，一日都令他們兩口子擔心，浩民說：「一路排緊期，要幾耐都未知，唔係我哋話乜就乜，批定唔批要睇話事人。」他續說：「總之上次發生嘅事唔係第一次，Lisa當時帶住個仔坐飛機，又冇準備奶粉，佢當時大住肚喺入境處係咁等，有大有細，過程的確令人唔開心。我知道呢個政策係保障香港人，保障冇假結婚，但我哋擺明唔係假結婚，我哋好尊重香港法律，不過無奈囉！有時我拍戲，請唔到假點搞呢？」說時浩民帶點激氣之餘，亦眼泛淚光。

夫妻相處貴乎真誠，有情侶喜歡日見夜見，但浩民和Lisa在兩地分隔下以另一種方式維繫感情，Lisa說：「我哋唔係成日見，與其話我哋係夫妻，我哋更加似情侶。我哋並唔係正常夫妻，朝九晚五下班就見，我哋經常見唔到面，所以少好多生活上摩擦，反而多咗一份思念，天天的念同偶爾的念好唔同，真係一日不見如隔三秋！」

錫晒．容忍度高

而浩民則比較內斂，會用另一種角度去看夫妻關係：「夫妻一定會嗌交，喺生活上點都會有矛盾，但因為少見Lisa，所以我對佢容忍度會較大，有時唔啱胃口咪啃咗佢囉，鬼叫耐冇見咩。其實我一切以佢為先，有時明知佢錯，我都係做善後嘅一個。Lisa係人馬座，份人好隨機，而我係天秤座，乜嘢都會諗到最後一秒，我哋可以互補不足。」

娶個老婆返嚟當然要錫，視Lisa為公主的浩民原來一直冇想過娶內地老婆，他說：「佢唔係我嘅公主，係我太后，我微信佢個名叫『太后娘娘』。我當初真係冇諗過娶佢，莫講話娶邊個，就連結婚都冇諗過。我以前嘅行為、歷史都係咁（指同居），結婚只係儀式。不過Lisa有咗BB，我要對佢哋負責任，所以就決定結婚。佢係個好好嘅女仔，以前嗰啲拍咁耐都唔結，同佢冇耐就拉埋，當然有佢吸引之處，佢待人接物比我成熟好多。」

家有三隻「化骨龍」，第四個就快出世，兩公婆如何照顧小朋友成為重要課題，Lisa說：「照顧小朋友問題真係令我哋傷腦筋，浩民唔喺香港，我上嗰排又要返內地做真人騷，所以要叫我媽咪嚟香港照顧小朋友，雖然屋企有工人姐姐，但始終要搵家人幫手先放心。」談到教小朋友方式，原來Lisa做「衰人」角色，浩民則是孩子的大英雄，浩民說：「我就係破壞規矩嗰個，不過大原則同價值觀唔會變。但每次見到細路，都會偷偷哋畀糖佢哋食，等佢哋開心吓。不過老婆立場係等到小朋友18歲，佢哋會知道唔畀食零食係為佢哋好。總之我係孩子王，事事會以小朋友角度去睇，佢哋三個都驚媽咪，所以都等我返去救佢哋！」

虎媽．寧願嗌交

Lisa的虎媽形象深入孩子心，問到會否想培養小朋友做愛迪生或莫扎特？她說：「唔會，反而想建立佢哋姊弟之間嘅互動關係，我好少畀佢哋玩iPad，寧願佢哋嗌交。我唔會逼佢哋學嘢，而佢哋唔知係咪遺傳爸爸演藝基因，一上到台就上晒電，唔使排練已經識得表演，仲好有自信。」

後記：四年抱四

陳浩民四年抱四，令不少人妒忌，點解佢咁犀利？是否如他所言掂一掂老婆就生得？他大爆秘密餐單：「番茄炒蛋，我真係日日食，我叫劇組每日都整一碟番茄炒蛋同一碟菜，有埋洋葱炒午餐肉就最好，洋葱可以軟化血管，仲可以降膽固醇，對身體有益。」只有餐單還未夠，浩民還有一個秘訣，就是離開香港造人：「我只係掂過佢四次，第一次喺山東；第二次喺曼谷；第三次喺馬爾代夫；第四次喺安徽。我覺得造人要開心，去吓旅行或身在外地，心情會輕鬆啲！」