宋仲基晒完美肌肉　網民：屈晒機！

由韓國女神宋慧喬及童顏男神宋仲基主演嘅韓劇《太陽的後裔》昨晚首播，硬撼宋慧喬昔日拍檔Rain所主演嘅《回來吧，大叔》，《太》劇首集收視就收視高開，成為同時段收視冠軍，認真犀利！呢套劇未播之前就已經引起熱議，話晒都係宋仲基服完兵役復出嘅首部劇集，一班「基」迷相隔四年終於可以喺幕前見番偶像梗係開心啦，加上同靚女宋慧喬呢個「雙宋」配，顏值度爆晒燈，又點會唔睇到網民嘩嘩聲！

露肉晒肌

網民除咗大讚雙宋配新鮮，第一集嘅亮點仲有宋仲基嘅上身半裸戲份，現年30歲嘅宋仲基擁有男女都為之羨慕嘅Baby Face，皮膚仲好似牛奶咁又白又滑，不過錫身嘅佢以往喺劇集的確甚少見佢露肉，今次一復出就喺《太》劇首集赤膊騷肌做Gym，唔少絲打都大讚男神身形正到爆，巴打見到佢個強勁Body加童顏，都大呼屈晒機！有網民又話宋仲基平時睇落身形唔多有睇頭，估唔到除咗衫會咁有視覺效果，仲話佢名副其實係「脫衣有肉，穿衣顯瘦」嘅典範！

而首次合作嘅「雙宋」配搭亦極為吸睛，雖則宋慧喬年紀大宋仲基四年，不過網友就話呢段姊弟戀襯到絕，毫無違和感！網民又話宋慧喬拍親劇都會同男主角傳出緋聞，相信今次同宋仲基合作都唔例外，不過亦有網民覺得宋慧喬同Rain喺《浪漫滿屋》嘅情侶形象太入腦，相隔12年依然覺得佢哋最襯，睇唔慣「雙宋」呢個組合喎！

網民有話兒

chixx_lax：見到鐘（仲）基BB個BB樣，真係好想一啖錫落去

Kaxyinchxxx：望住宋鐘（仲）基啲肌肉即刻心跳加速，心血少啲都唔得！

ixn_wxxg：平時韓劇男主角都唔會咁早晒肌，今次真係賣大包

Janixx_yeuxx！兩個相差四年，不過又一啲違和感都冇喎，仲好襯添

lexxn_Txx！都係中2（鍾意）浪漫滿屋入面嘅喬妹同Rain多啲，宋仲基個樣太嫩口啦