歐陽震華拍喜劇呻辛苦：個腦實晒

藝人歐陽震華（Bobby）及胡楓到九龍灣某遊戲機中心，為新劇《一屋老友記》拍攝外景，Bobby稱自己戲份快將煞科：「仲有幾日拍晒，都拍咗幾個月啦，第一主景：屋企，拍咗60幾日，第二主景：小食店，十場戲八場有我，唔係體力上嘅辛苦，係心攰，個腦實晒，你知喜劇係要現場度啲嘢，所以呢個劇煞科我都要抖抖，回一回氣。（去旅行？）喺香港抖吓先，再睇啦！」

Bobby今日拍攝為劇中被胡楓上身的張彥博出頭，結果被打的情節，雖然年前曾因急性肺炎入院，但他笑言拍劇冇錫身，他說：「喺控制範圍做到嘅都自己做，之前有晚拍劇未輪到我，我就瞓一陣，後來有人畀粒話梅我食，之後我做咗個側手翻，現場大吃一驚，其實側手翻啫，又唔係空翻，有幾難？但啲同事之後就話凡見Bobby攰，就畀粒話梅佢食，話話梅令人興奮咁話！」