泳兒心痛病母：講唔到嘢淨係擘大眼

歌手泳兒現身電台宣傳新歌《四不像》，她表示新歌講述有時人在感情、工作、生活上會被逼屈服、改變自己，最後令自己甚麼都不像。問到自己在感情方面，跟男友可有類似經驗？她表示：「拍拖嘅時候都會有類似嘅小經歷，可能大家生活習慣唔同，但都要搵方法磨合。（有冇試過嘈交？）會㗎，我係比較緊張嘅人，佢就係比較relax，所以有時會幾憎佢咁hea，但又啱嘅，如果兩個緊張就會易嗌交，所以兩個極端只要搵到方式磨合就ok。」

冇畀公司放棄

泳兒亦透露現時已錄了三首新歌：「隔兩年再出新歌，感覺有啲新，之前都係唱翻唱歌，都有歌迷問我係咪畀公司放棄，所以冇新歌唱，但當然唔係，只係唔同階段，而三月尾四月頭都會出碟，當中有新歌亦有翻唱，所以歌迷唔使擔心我被放棄。」

「呢三個月都唔夠瞓」

而講到泳兒媽媽之前中風入院，問到好番未？她神情黯然，並有少許眼紅紅謂：「唔係好番，係個樣冇咁攰，面色好咗，但個腦太傷，要時間好番，件事發生嗰陣我都好突然，嗰陣錄緊新歌，心情都好辛苦，但知道媽咪都想聽我新歌，所以一錄好都即刻畀媽咪聽，等佢有啲記憶。（醫生有冇講佢幾時可以好番？）冇，呢個病唔係醫生可以做到嘅嘢，要家人多啲時間陪佢，等佢勾起回憶。（媽咪依家講唔講到嘢？）講唔到，淨係擘大眼。」講到她要工作又要照顧媽媽，她表示：「係好攰，我覺得我呢三個月都唔夠瞓，但冇辦法，依家屋企得我一個女人，好多嘢要親力親為，所以呢三個月自己成長得好快，同埋面臨住生離死別，好多嘢唔知，第時唔知有冇機會做，所以要好好珍惜。」