曾志偉爆阿仔咀完肥媽轉「基」

殿堂級歌手肥媽（Maria Cordero）假紅館舉行尾場告別演唱會《肥媽友誼長存30周年演唱會》，吸引多位圈中好友捧場，包括徐小鳳、戴夢夢、狄龍、黃淑儀、鄧達智、王梓軒、魯芬、李寶安等人，而外籍老公則擔任鼓手，期間又送花給肥媽。

晚晚有唔同嘉賓

全晚肥媽邀得多位嘉賓好友上台表演，除了「男子組」吳志雄、李天翔、古卓文、「女子組」黑妹、蘇珊、方伊琪、羅敏莊及阮兆祥反串扮肥媽外，其餘嘉賓都跟首場不同，包括陳奐仁、黃小琥、身穿高衩裙的陳潔靈等人。

考慮再開「獎門人」

其中阮兆祥反串扮肥媽，兩人邀請胡楓出場，胡楓出場時更搞笑扮認錯阮兆祥是肥媽，還問肥媽：「係咪你個女？有啲似樣。」之後胡楓獨唱《儂本多情》。然後阮兆祥介紹「偉仔」出場，當全場觀眾估是梁朝偉時，豈料出現的是曾志偉，故志偉出場即謂：「使唔使咁介紹我呀？出嚟幾驚大家噓，好彩大家係有愛心嘅人。同埋原來我係喺修哥之後出場，先知原來我係今晚最後生嗰個。」志偉繼續謂：「每次返嚟香港，啲人就會話『獎門人返嚟啦？幾時有獎門人呀？』每次我都好心動，大家想唔想睇獎門人呀？再有獎門人好唔好？」觀眾報以熱烈歡呼聲後，志偉謂：「好，我返去諗吓，不過都未有咁快。」

咀完肥媽變gay

之後肥媽亦出場，跟志偉大放笑彈，肥媽講到小鳳姐亦有到場，抵死的志偉即謂：「小鳳姐你好得閒？咁嘅騷都睇？」搞到肥媽即刻拍打鬧志偉：「撞鬼呀你！作死呀你！」之後抵死的志偉繼續搞gag：「肥媽係唯一一個人令我差啲同個仔脫離父子關係，因為喺套戲裏面肥媽要同我個仔打茄輪，我同仔講做人就係咁，好一餐，唔好又一餐，如果肥媽你都啃得落，人生有咩啃唔落？所以由個日起我個仔長大咗，但好似變咗gay。」笑爆全場。

酒醒唔識唱歌

之後他們準備合唱徐小鳳的《喜氣洋洋》，志偉亦謂：「我今日晏晝綵排發覺原來我唔識唱呢首歌，原來我醒咗唔識唱，要飲醉酒先識唱。」他們唱歌期間，坐的座位上的小鳳姐亦有企起身跟住一起唱。

張衞健翻生全靠肥媽

之後輪到Big Four出場，抵死的張衞健謂：「初初以為肥媽啲fans係三高，估唔到都幾有活力。」之後眾人跟肥媽談天，其中許志安及梁漢文都謂希望肥媽永遠不退休、永遠帶歡樂給大家，而張衞健亦正經謂：「多謝肥媽，記得廿幾年前，有一年我真係霉dum，有一日晏晝三點幾，安仔喺我屋企，我講我一整年真係冇收入，佢叫我搵啲騷做，我話都冇人搵我，佢就問我識唔識肥媽，仲介紹肥媽我識，肥媽二話不說即刻簽我十場。」安仔即謂：「估唔到你真係記得，仲以為你忘恩負義。」張衞健續道：「所以自此肥媽發現我聲色藝俱全，以後都搵我唔搵許志安。」蘇永康亦謂：「尋晚上網睇資料，原來肥媽08年已經獲頒榮譽徽章，佢做咗好多善事係冇人知，所以真係要秉承佢呢個精神繼續做好自己。」之後五人合唱《嘥氣》。

提醒大家香港精神

而全晚肥媽提到朋友及家人支持時多度哽咽落淚，唱到《媽媽I Love You》時，她又忍不住喊，期間兩個孫女上台獻花，而臨encore前肥媽一家亦有上台。到了encore時，肥媽感謝家人時又再次落淚：「屋企人對我好好，佢哋好慘，啲孫好慘，因為我嘅關係佢哋畀人影到，搞到佢哋返學會畀人笑，但佢哋都冇怨過我，永遠喺我隔離，朋友對我都好好，一收到電話即刻過嚟幫手。」而全晚肥媽又多次提醒大家香港精神：「香港係福地，只要努力唔會唔得，如果香港冇咁多怨氣，有人鬧你，你同佢講多謝，睇佢點死，所以我對香港非常有信心，家和萬事興、家衰口不停，香港人係未驚過！」最後演唱會約在11時40分結束。