PATA@X JAPAN已出院　YOSHIKI驚喜現身

日本樂隊X JAPAN的紀錄片《WE ARE X》噚日喺美國德薩斯州舉行嘅SXSW音樂節搞首映，隊長YOSHIKI特別飛到當地出席。唔少樂迷見到YOSHIKI都好興奮，而YOSHIKI亦為粉絲帶嚟好消息，透露入院兩個月嘅50歲結他手PATA，已經喺大前日出院，令歌迷都鬆口氣。

PATA於1月中因患大腸憩室炎及門靜脈血栓症入院，一度要喺深切治療部（ICU）接受治療，令不少歌迷非常擔心。YOSHIKI透露PATA依家已經回復精神，而X JAPAN亦有望秋天復工。而YOSHIKI亦有談及話題樂隊「極品下流少女」，並讚賞主音川谷繪音好有才華，但希望佢做任何事都要以歌迷為先。YOSHIKI又即場彈鋼琴演奏X JAPAN的名曲《FOREVER LOVE》及已故樂壇巨星大衞寶兒嘅歌曲《Space Oddity》等。

另外，當日亦發生小插曲，話說另一個會場舉行「日本之夜」活動，但原定表演嘅三隊日本樂隊臨時因事取消演出，YOSHIKI知道後，為咗唔好令在場觀眾失望，自願頂替演出，現場觀眾見到YOSHIKI驚喜現身演出，都非常驚訝又興奮。