朱千雪破Dry求愛 情迷四眼甜心男
前港姐朱千雪(Tracy)自2012年當選香港小姐季軍後,備受無綫力捧,不過Tracy去年毅然向無綫請假一年,於中文大學修讀企業傳播管理碩士課程。有樣有家底有學歷的Tracy,日常生活卻十分平民化,日前見她獨個兒到商場行街,雖然面對名店林立,但她仍不為動容,反而到超級市場濕平買蛋糕,到餐廳與朋友慶生及睇戲,當時Tracy春風滿面,心情靚爆。
求偶大作戰
「三高」的Tracy早前出席活動時自爆六年冇拍過拖,觀乎緋聞男友亦只得馬國明及黃宗澤,感情生活認真淡如水。早前她受訪時透露持開放態度結識異性,更公開五大擇偶條件「鍾意食嘢、有安全感、有幽默感、細心及顧家」,並坦言幸福要自己爭取。想不到Tracy講得出做得到,日前得到袁偉豪女友兼同屆前港姐岑杏賢介紹之下,展開「求偶大作戰」!
日前晚上六時許,Tracy駕車到灣仔某停車場,然後步行至銅鑼灣會合一名女友人,繼而到餐廳用膳,並會合岑杏賢與其他朋友。原來岑杏賢充當媒人,安排Tracy與一名「四眼甜心男」見面。見二人打招呼後,便開展相睇之旅。「四眼甜心男」十分細心,不時關心Tracy選擇甚麼食物,似乎想探聽Tracy口味。經過一輪了解過後,見二人傾得甚為投契,不時邊食邊講邊笑,感情已更進一步。
再嗒糖水
享用晚餐後,似乎仍未夠喉,Tracy、「四眼甜心男」及岑杏賢到大坑食糖水,甚有紳士風度的「四眼甜心男」與岑杏賢到糖水舖買糖水,Tracy則留在車上。等外賣時,見他與岑杏賢密密傾,似乎「四眼甜心男」與岑杏賢討論剛才的「攻勢」是否順利。二人買了外賣後立即上車,然後由Tracy充當司機送眾人回家。
《東網》致電Tracy,問她是否與「四眼甜心男」發展中?她說:「佢係我哋其中一個好朋友,只係大家成班朋友食飯,大家諗多咗。(有冇發展緊嘅男仔?)多謝大家關心,了解吓了解吓,第日如果有再同大家講。」至於岑杏賢則表示:「個男仔係我哋共同朋友。(個男仔有冇女朋友?)咁呢層我就唔知啦。」