無限復活！網民開盤估羅樂林新劇死幾次

號稱「死亡之使」嘅藝人羅樂林曾經因為24小時內死足5次而創下香港電視史紀錄兼獲美國、澳洲、意大利等六國傳媒廣泛報道，可謂蜚聲國際！然而，呢個「死亡之使」近排又再戰無綫，於現正熱播嘅劇集《EU超時任務》入面死足N次，無限復活！

於《EU》中飾演主角朱千雪爸爸嘅羅樂林，話都冇咁快就喺首集因中流彈身亡，不過其後佢就獲擁有穿梭時空「超能力」嘅朱千雪企圖穿越拯救佢，如是者，不斷來來回回，死完又復活，死完又復活......隨即令唔少觀眾覺得呢個畫面似曾相識，仲笑言：「tvb見到羅樂林，已經同個死字畫上等號。」

劇集至今雖然只播咗三集，但已有網民不禁留言驚呼大嘆頭兩集已充滿戲劇性：「第一集知佢死既（嘅）時侯，第一反應都係！哇！羅樂林又死呀？到第二集睇到要救佢！個反應係！哇！係咪Sunday好戲王之睇你點死！」有網友更開盤叫大家估羅樂林喺新劇中要死幾次？

「死開有條路」

對於羅樂林今次獲派做呢個角色，唔少網民亦「陰謀論」指一定係監製嘅主意，知道羅樂林「死開有條路」，又可以起到宣傳作用，之不過劇集監製林志華對此就曾表示只係羅樂林咁啱有檔期，而角色又啱佢，並非刻意「欽點」！

網民有話兒：

WeiXXXXXX：係時候請阿不死珊出離（嚟）同羅樂林講下（吓）自己的不死心得！

XXXyee：第一集知佢死既（嘅）時侯第一反應都係！哇！羅樂林又死呀？到第二集睇到要救佢，果（個）反應係 哇！係咪Sunday好戲王之睇你點死！

fxxxxt：tvb見到羅樂林，已經同個死字畫上等號。

Erxxxg： 有望打破紀錄～～

cxxxxlam：昨晚個劇情時辰未到，死少左（咗）一集！