無綫五月完約 朱慧敏認有其他公司接洽
藝人朱慧敏到九龍灣出席由仁濟主辦的電影《回到起步時》首映禮。有份主演的慧敏今次飾演人母,受訪時笑言自己已是第二度演人母:「第一次係8年前,已經有一個十歲嘅仔。其實能夠拍呢部戲係好有緣份,因為當時我係拍緊無綫劇《愛·回家》,個檔期好難度,但佢哋都等咗我四個月,寧願拍晒其他人嘅戲先,到最後一個星期,咁啱我拍完《愛》劇。(義拍?)有收錢嘅,不過係慈善價,其實錢唔係咁重要,因為係好有意義,因為呢部戲係由一班同學仔同老師嘅心血結晶。」
朱慧敏又表示自己學生年代亦曾參加過學生會舉辦同類活動,更以同校師兄張國榮及師姐陳慧琳常出席母校活動為榜樣,希望藉個人小力量鼓勵後輩。
繼約以藝員合約為主
而慧敏最近亦忙於登台、商演,坦認與無綫的合約將於五月完結,但合作條件仍在傾談當中,以藝員合約為方向而非經理人合約:「始終我喺無綫12年,好多謝佢哋畀機會同曝光率我,我學到好多嘢。(有其他公司同你接洽?)都一定有㗎喇。」