藝人岑麗香（香香）以露肩裙裝現身銅鑼灣，為食店擔任剪綵嘉賓。期間親手炮製吐司的香香與司儀阮小儀夾份整蠱金剛，她先假裝餵金剛食甜品，再由小儀將雪糕球一下塞入金剛口中，令對方頓時凍得噴雪糕，表現狼狽！其後小儀向金剛送上圍裙：「睇你喺無綫都冇咩嘢做，畀圍裙你隨時嚟返工！」金剛即反擊：「見你相睇都冇嘢做，送番圍裙畀你！」

搵男友做白老鼠

其後香香受訪時透露經常下廚及整甜品，而男友強強更曾擔任白老鼠試食，她說：「我細個會焗曲奇同整蛋糕。（男友試過你手勢？）有，我哋遠距離戀愛好難得，上年我拍節目《明星愛廚房》時整雞翼失敗，到最後一集再煮前畀過佢食，苦練咗好多次。（佢有冇菜式想你煮？）要有時間先得。」

整蛋糕冧強強

問她何不趁男友生日下廚？香香透露男友已於3月13日生日，當時她身處加拿大探親，故與對方提早慶祝，她說：「我好叻整生日蛋糕，但要生日正日送就要擺落保鮮盒寄畀佢。（唔飛過去搵佢？）時間夾到先。（掛住佢？）會掛住，保持聯絡，手機都可以見到面。」香香又言幫男友捐錢作慈善，當作送給對方的生日禮物。