林憶蓮騷尾場　當男友面向倫永亮示愛

歌手林憶蓮一連四場《2016林憶蓮PRANAVA/造樂者》世界巡迴演唱會在紅館舉行最後一場，契爺胡楓連日捧場外，尾場更吸引莫文蔚、周麗淇到場睇騷。

開騷時台上憶蓮講到前排第一行都是她的中學同學，自爆他們都喚她「阿蓮」。至於如憶蓮所言因最後一場會攞定紙巾抺眼淚，她多次被感動落淚成為「喊包」，尤其說到大家有香港精神，要發放正能量，希望台下歌迷可將今夜的歡樂帶出去。

雖然舞台上全程有男友恭碩良為她打鼓，但歌迷對台上另一位「男士」倫永亮（Anthony）反應更熱烈，憶蓮更公然向Anthony說「我愛你」，Anthony即手指向恭碩良方向，憶蓮即笑言：「呢種愛同嗰種愛唔同，唔能夠混淆。」

而演唱期間，憶蓮又謂年紀是一個心態，幾多歳都沒有所謂，最重要開心，就如她契爺胡楓一樣，心境快樂，有溫暖便有正能量。

最後一場Anthony早已為憶蓮準備多首歌來Encore，憶蓮笑言：「唱到十二點都冇所謂，係製作單位畀錢嘅。」之後兩人合唱《明天醒來時》，唱畢後Anthony百無禁忌謂：「喺我臨瓜柴前有呢個美好回憶。」搞得憶蓮不知好嬲定好笑。之後再多唱四首歌，以《至少還有你》為演唱會畫上句號。