吳毅將斷腳變肥仔　感激亞視照畀機會

藝人吳毅將，於1982年入讀亞洲電視訓練班，演出過多齣亞視劇集，如：《皇家檔案》系列、《皇家警察實錄》系列、《暴雨燃燒》、《勝者為王II天下無敵》、《滿清十三皇朝》、《碧血青天楊家將》等，是亞視當年力捧小生。1990年轉投電影圈，後轉往無綫，之後返內地發展。

讚亞視有人情味

吳毅將揚言「冇亞視，冇吳毅將！」：「《東網》讀者大家好，我係吳毅將，好耐冇見大家，你哋好嗎？講開亞視，我係正宗亞視出身，喺1982年參加啱啱由邱德根接手，改台徽嘅亞洲電視，我係第一期，何家勁、葉玉萍、曾偉權係我師兄、師姐，同期有黃秋生、苑瓊丹、麥翠嫻都係我同學。唔經唔覺，我入行34年，亞視令我有好大感慨，因為我訓練班出身，但未畢業已被公司選中做男主角，出嚟反應都幾好，但係好唔好彩，拍完部戲我因為踢波發生意外斷腳，休息咗成年，成個人肥晒，肥到蔣金咁，唔好諗做主角，人哋仲要唔要你都成問題，但唔緊要，公司都簽我做基本演員，記得當年我係棟住拐杖返去簽約，第一日開番工都係撐住拐杖埋位，公司真係好有人情味！」

命運安排考亞視

吳毅將直言當初報考亞視，也似是命運安排，他說：「初初我想考嘅唔係演員，而係武師訓練班，因為我鍾意動作，點知原來係演員班，咁就照讀照試，結果連過三關，都可以話係無心插柳柳成蔭。點解當年唔考無綫？因為當時TVB未開考，ATV開先，咁就順理成章去咗讀。亞視對我演藝培育作出好大幫助，畀咗好多經驗同做人態度我，由後生到成熟，到作為專業演員，冇亞視冇今日吳毅將，我好多謝亞視！公司力捧咗我好長時間，到後期我出去拍戲，都冇忘記母台，記得當年啲前輩好用心教我哋嘢，我都受到影響，到我後來喺香港好、大陸好，我都會幫番人，人哋以前點幫我，我都點幫人。」