1個表情NG逾60次！學友被王家衛Hurt爆
藝人張學友出席「電影的張學友與張學友的電影」座談會，大談多年來拍攝電影的點滴，自爆因拍攝電影《痴心的我》改變其一生，皆因邂逅了太太羅美薇，他謂：「拍戲係好重要嘅訓練，當真就會有手尾，之後咪知囉，第一部乜都唔識，以為真係要好真，結果影響自己一生，過程要去畀自己真係鍾意嗰個人，依家錫一萬次都唔再敢去發生咩事，戲完就完，當時唔識，感覺就揮之不去，隔住紗kiss好奇，有時有啲嘢唔可以發掘嘅。」
與王家衛合作感受
而學友亦有透露與導演王家衛合作感受，對於《旺角卡門》及《阿飛正傳》被指其角色乃馬田史高西斯執導的《Mean Streets》內的羅拔迪尼路演的角色原形，學友笑指拍攝前沒有參考羅拔的作品，更謂：「兩部戲都搵我抄羅拔迪尼路，多謝咁睇得起我，羅拔係業界受尊重嘅演員，對我嚟講，王家衛開始時參考好多其他戲，好似學行學走一樣都要學。」
因《阿》片關係有變
而因《阿》片一場亦令學友與王導關係有變，他謂：「有場戲做個簡單表情拍咗60幾次，拍到佢話算就行開咗，我個心唔舒服，我同佢係朋友，點解要咁對我，自己分唔開，我都唔知佢點為之係好，呢個亦都係後來少同佢合作嘅原因，但王家衛都係好有才華同出色嘅導演。」學友還講到《東邪西毒》應該是最後一部與王家衛合作的電影。
睇番《男人四十》眼濕濕
對於曾憑電影《喋血街頭》首次提名金像獎影帝，現場更播放電影小片段，學友看罷笑謂：「演得幾好呀！咁都冇，咁應該都冇啦喎！」而及後大會也播放學友奪金馬獎「最佳男配角」的電影《笑傲江湖》片段，對此學友則謂：「我都唔知點解會攞，但我唔深究，其實攞唔攞都冇所謂。」而曾與已故好友梅艷芳合作《男人四十》的他，於觀賞片段時也不禁眼濕濕，更輕抹眼角。
因大女出世減產
而學友更指自2000年後因大女兒出世，令其生活上改變而減少接電影，他謂：「依家我50幾歲，好想真實地經歷每個人生階段，唔希望戇居咁過，但我都未至於冇人搵嘅。」
最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！
最強娛樂APP「東網巨星」下載連結：