亞視回顧：亞視「乜乜乜」之最

亞洲電視於昨日正式畫上句號，由麗的呼聲、麗的映聲、麗的電視到亞洲電視至今59年，即使幾番改朝換代，仍使出各種奇招，幾許風雨下仍變變變變出生命力，多次打出漂亮的一仗。功過誰定，起碼亞視打出的江山是如此多Fun！

最Hit劇集　威脅大台！

亞視前身「麗的映聲」於1973年改名「麗的電視」轉為免費廣播，由「麗的三雄」麥當雄、李兆熊及屠用雄監製、1979年徐少強主演的《天蠶變》更創當年收視新高，1980年劉志榮主演的《大地恩情》收視率以六比四令無綫的《輪流傳》被迫腰斬。而1981年由蔡楓華、莊靜而及鍾保羅主演的《IQ成熟時》等青春劇亦大受歡迎，還有不少劇集如《大內群英》及《鱷魚淚》等贏口碑兼收視！而1998年的《我和殭屍有個約會》由尹天照、萬綺雯主演，反應理想下亞視先後開拍三輯。

最賺錢　邱德根慳到盡！

大富由慳，小富由爭！1982年邱德根入主並正式改名為「亞洲電視」，為節省開支全方位慳慳慳，包括控制廁所紙巾數量及停用電梯，名副其實為環保又慳家！邱德根慳家經典事，於農曆年派利是，位位兩蚊硬幣一封，擲地有聲，再另加旗下銀行五元禮券，要親身去銀行兌番五蚊，分分鐘車費都蝕埋！就是這份慳爆作風，帶領亞視邁向轉虧為盈的時代，是唯一一位賺錢的老闆。變變變，為確立電視台地位，首辦選美盛事《亞洲小姐競選》，首屆冠軍為黎燕珊，之後吸引不少北方佳麗來港一圓選美夢。亞姐亦盛產性感女星及三級片新血，包括葉玉卿、利智、翁虹、伍詠薇、吳綺莉、羅霖、楊恭如、陳煒及韓君婷等。

最強綜藝《百萬富翁》派錢！

由林建明及歐錦棠等主持的《今日睇真D》跟進城中大小事，深入追擊，具娛樂性，就連無綫也即搞《城市追擊》迎戰！1995 年《睇真D》播放解剖外星人片段，分成數日連續播放，觀眾邊追邊鬧，鬧到今日人人記得，非常成功！2001年推出源自英國電視遊戲節目的《百萬富翁》，每次送出最高100萬港元獎金，由陳啟泰主持，自開播以來收視節節向上，最高收視達39點，連周星馳都出席任嘉賓，就算無綫推出《一筆Out消》亦難以對付！

最風光　林百欣掟銀彈！

1988年林百欣入主，以銀彈政策求改革，更由無綫挖角多位人才如沈殿霞、曾志偉及盧海鵬等過檔，林建明更自爆酬勞為以前的十倍！愛魚如命的林伯親民親切，常和員工一起食飯，甚至融入家中邀請員工在家食飯唱粵曲，魚柳包打人牙骹軟，冧林伯，識買梗係買魚柳包！當年經典劇集《我來自潮州》、《再見艷陽天》及《包青天》等家家傳頌。

最巨星　紅星搖籃！

59年孕育不少巨星，張國榮在麗的年代《甜甜廿四味》等已鋒芒畢露，甄子丹的《洪熙官》及《精武門》已身手不凡，七料影帝張家輝、收視福將關詠荷，又導又演的杜汶澤，以及視后田蕊妮等，都是亞視出身。

最騎呢　利智「陰毛論」！

於2001年的女優選拔賽找來日本多名AV女優玩水上活動及在鏡頭前食蟲！而1986年亞姐冠軍利智，當年出口成「文」，不純正的廣東話變成不文笑話，包括「陰謀」變「陰毛」，加上招牌式的抖大氣，雙峰起伏說：「你哋話蟹唔蟹（係唔係）？」千古傳頌。另外，於2004台慶亞視邀得AC米蘭球員岩布仙尼出席，和亞視同日生日的岩布仙尼被迫無奈獻金口唱「Happy birthday to me...」台慶更有另類慶祝方式，2012年無端移師北京舉行並慶足四粒鐘，觀眾悶爆離場，搞到臨尾藝人要向空櫈掟壽包！