網民熱話:盤點新紮「文青女神」

[19:57] 03/04/2016
東網電視
更多新聞短片

「文青」呢個term興起多時,至今更已擴展到連衣着品味、嗜好、地方都被「文青化」!不論你喺淘寶淘緊衫定去cafe飲杯嘢,都唔難見到「文青專用」、「文青必去」等等嘅字眼,而近排有網民更於討論區盤點一眾新紮「文青女神」,仲有明文規定指被推舉嘅女神必定要有仙氣,並非流於表面嘅「偽文青」!

第一位:袁澧林

憑美心廣告而成功彈出嘅袁澧林(Angela)除擁有高挑身形外,仲生得一副可愛臉。平日於網上社交平台中亦經常大晒素顏照、造型照嘅佢,無論面形、身形都可塑性極高,出道無耐已成為多個品牌寵兒。工作以外,Angela不時亦會與其他攝影好友周圍去影啲「感覺照」,冰室、屋邨、海邊等介紹過多個攝影好地方,帶住39萬名followers上山下海。然而,剪得一頭短髮嘅佢除咗憑清新形象深得網民歡心外,有唔少followers更力撐佢性格一樣咁「文青」,直指早排到過清邁、越南嘅佢於旅程中夠「貼地」,住民宿睇景體驗當地文化:「唔係好似其他靚模咁,又酒店又high tea,人哋真係去啲有當地文化特色嘅地方!」

第二位:楊偲泳

而其次就有曾於歌曲《矛盾一生》MV女主角楊偲泳(Renci),外表甜到漏嘅佢吸埋吸埋亦有近13萬名粉絲追蹤。平日亦非常熱愛攝影嘅佢,不時都於網上,天空、街景,早餐,咩都影一餐,仲張張都好有意境,被網民激讚:「Renci夠自然!真正又pure又true!」

第三位:江嘉敏

至於,第三位嘅江嘉敏(Kaman)曾參演多個MV,當中以歌曲《學習浪漫》嘅學生妹look最令人深刻,有網民期間更大讚佢音樂造詣高,仙氣十足:「江嘉敏最嫩口,仲彈琴彈到演奏級,無得輸,仙氣爆棚~」

網民熱話:

彿xx周:唔係好似其他靚模咁,又酒店又high tea,人地(哋)真係去啲有當地文化特色嘅地方!
cheungxxi:Renci夠自然!真正又pure又true!
x姨:江嘉敏最嫩口,仲彈琴彈到演奏級,無得輸,仙氣爆棚~
pochxxx:佢啲相人靚景靚之餘好有feel,就算唔笑個樣又唔會太惡,反而cool cool地好有味道!