莊思敏寸苟芸慧對點心店零貢獻：少見佢

去年點心店開業初期，苟芸慧向外稱是投資者，隨即辣㷫股東之一莊思敏，反稱股東名單並沒有苟芸慧的名字，鬧出股東身份羅生門，因而傳出兩人不咬弦。對於苟芸慧無心戀戰點心店，莊思敏表示不知情，她說：「我唔知，等佢同大股東傾。（係咪你同苟芸慧不和令佢有意退出？）唔會！覺得唔係，因為之後我哋傾過，已經冇問題，將誤會解決晒，我諗唔關事。」問到是否覺得苟芸慧經常冇影對公司零貢獻？她直言的確很少在點心店見到對方，並暗寸謂：「真係好少撞到佢！唔知係咪佢同大股東嘅共識。（但你就好落力宣傳？）我同Qinnie（大股東陳君宜）有共識，會盡力宣傳，唔知Qinnie冇叫佢，定佢冇做啦！」