祖兒落敗比賽　祖藍撐腳傷影響表現

藝人王祖藍在荃灣出席旅行社活動，曾於日本機場兌換日圓的他，表示找換金錢後發現市內兌換日元更抵，因此要求銀行退回差價，對方竟然一口答應，王祖藍表示：「因為我冇帶護照，問完結果又得，佢哋仲教我點入番機場！」

嗌陳偉霆咪妄自菲薄

講到好友容祖兒在內地節目《我是歌手4》中落敗，曾經探祖兒班的他認為對方因腳傷而影響水準：「佢不嬲都係好博命，係好出色嘅歌手。」更指對方隻腳腫到好似拳頭咁大：「佢綵排時仲話冇事！（咁博命應有更好名次？）好難講，嗰個係李玟，其實過程最緊要，依家好多人都識佢。（陳偉霆話自己幫唔到手。）唔好孭隻鑊上身，唔好太妄自菲薄，大家都好厲害！」

年尾開拍《老表3》

而正籌組工作室的他透露年尾會開拍《老表》系列第三輯，更笑住投訴好拍檔張繼聰、王菀之和林盛斌等太紅難度期。至於提到早前他與韓庚、李璨琛等兄弟出席內地藝人包貝爾婚禮時，因將柳岩掟落水而被網友炮轟，他聞言即謂：「唔特別回應喇，大家都開心，喜事喜事。」