翠如蕭正楠公廁外求婚　張繼聰激凸見證

藝人黃翠如、蕭正楠（Edwin）、張繼聰同龔嘉欣（Katy）尋日傍晚到九龍城拍攝新劇《幕後玩家》，劇情配合該區舉行嘅潑水節，翠如、Edwin同Katy與眾同樂，一早已被眾臨時演員射到全身濕透，戲中翠如同Edwin同現實一樣飾演情侶，呢場戲講述女方主動求婚，不過地點就認真特別，竟然選擇喺公廁同垃圾房出面，似乎浪漫不足搞笑有餘，唔知仲聞唔聞到特別味道呢？

翠如大嗌「我結婚喇！」

劇情仲一反傳統，由翠如先拎出紙張宣讀「愛的宣言」，Edwin答應後即抱起翠如轉身，翠如興奮大叫：「我結婚喇！」但突然痛叫被「銀」親，原來Edwin都預備咗鑽戒，之後兩人接受Katy同其他演員射水祝福，場面熱鬧！呢個時候，飾演Edwin好友嘅張繼聰出場，仲向兩人潑水，不過亮點嚟喇！身穿西褲嘅阿聰下體竟然離奇拱起，以激凸見證婚事，果然夠破格！

水戰互射互潑

拍攝完成後，幾個貪玩豬仲玩水戰，鬥用水互射互潑，Katy同翠如率先拎起水槍向阿聰射水，Edwin加入戰團圍攻阿聰，眾星喺街頭奔跑閃避，Katy更玩到披頭散髮。當中以阿聰及Katy最狼胎，先後拎起裝有幾公升水嘅水桶互潑，嚇到原本笑住睇熱鬧嘅市民如鳥獸散，場面搞笑！

阿聰唔認「細」

講到阿聰下身激凸，Edwin搞笑說：「佢見親我都係咁嘅反應，見慣不怪！」阿聰就話開工好忙，根本冇心情理會「小聰」：「唔知喎！我冇留意！因為我太專心拍嘢，其實呢啲假象嚟嘅，條褲好鬆㗎！（有冇着多條泳褲打底？）咁又冇，呢啲嘢，男人唔會自認細嘅。（覺得自豪？）唔會喎！我個人好踏實。」

Edwin要講愛的宣言

至於Edwin同翠如都大讚劇情係反傳統浪漫故事，夠晒新穎，問到將來求婚時會唔會都咁另類？Edwin笑說：「未諗呀！但都希望咁有趣同搞笑！（叫翠如讀愛的宣言？）應該由男人做嘅嘢就男人做番好啲！」翠如就話最難忘反而係拍完後圍攻阿聰：「因為張繼聰喺架車度等咁耐，我哋希望佢融入個環境多啲，所以夾攻整濕佢！」

最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

　http://on.cc/redirect/entertainment