拍拖1年諗結婚　陳凱琳計劃加國擺酒

前港姐冠軍陳凱琳（Grace）以紅色露腰裙出席溫哥華新樓盤活動，她表示將來有意讓小朋友在加拿大生活，因為自己也是在當地讀書及長大，覺得生活節奏比較舒服。問到男友鄭嘉穎是否知道她的計劃？她笑言：「依家咪知囉！不過呢啲都係將來嘅事。（你預計幾時生兒育女？）順其自然，可能去到某個年紀就會知。（男友未必等到？）兩個人一齊要有共識，到時候要互相遷就。（你哋有冇傾過？）有共識。（佢心急過你？）你要問番佢喇！（你唔心急？）可以慢慢嚟，我哋只係拍咗拖一年。」

Grace又透露將來想在加拿大拍婚照及擺酒，她坦言：「我啱啱有朋友喺嗰邊結婚，影咗啲婚紗相好靚，藍天白雲，其實唔一定要去歐洲，喺自己成長嘅地方影相都好有意義。而且我返嘅教會喺加拿大，父母嘅朋友都喺嗰邊。（男友對你嘅構思係咪贊同？）我話要去加拿大結婚應該唔係大問題，而且都會喺香港擺酒。」