全家撐沾Sir處男紅館騷　盧太自嘲奴隸

有「詞壇聖手」美譽的著名填詞人盧國沾，當年與已逝世的另一填詞人黃霑齊名，在香港樂壇舉足輕重，沾Sir將於今年7月22日及23日於紅館舉行兩場《歌詞大師盧國沾作品演唱會》。今日穿上西裝的沾Sir，在太太及女兒陪同下為演唱會拍攝宣傳海報，精神奕奕的沾Sir對於首度在紅館開騷，他笑說：「好緊張！（最想邊個做嘉賓？）冇所謂，粒粒都係紅星。」

今年68歲的沾Sir，40歲時因沖涼在浴缸滑倒，送院昏迷四日四夜，導致半身不遂，廿多年來需坐輪椅出入。沾Sir今次接受《東網》訪問時，盧太及女兒一直陪伴在旁，盧太更自嘲是沾Sir奴隸，沾Sir望住太太說：「感謝佢一路照顧。（咁要錫多佢兩啖？）梗係要！」沾Sir冧爆笑言冇揀錯太太，盧太則笑住自認是老一輩女人，並謂照顧老公係應該嘅，佢話：「照顧佢係辛苦，唔覺得吃力，除非佢死咗。」一家三口仲不時手拖手，溫情滿瀉。