林志穎新車落地唔飛得

台灣童顏星爸林志穎上年再添孖仔Jenson與Kyson，連太太和大仔一家五口生活樂也融融。一向熱愛賽車嘅林志穎剛成年就開始接觸跑車，至今已經參加過好多場賽車比賽。自從有咗小朋友之後林志穎又多咗一架新車玩，還將車嘅相片上載上網同大家分享。不過當佢揸住架新車時，佢只可以做個安份守己嘅司機，因為新車係一對孖仔嘅BB車。雖然冇飛車嗰種快感，不過見佢推住織咗囝囝英文名嘅「名車」出街有另一樂趣，林志穎留言：「昨天溜車今天溜娃娃車」。從另一張相片所見，一對孖仔雙腳又肥又白，見到都想伸手去搣一下。