同蕊蕊三年情玩完　金剛：唔想再拖落去

由台灣轉戰香港嘅藝人金剛最出名當然係講極都唔正嘅廣東話，加上性格開朗搞笑，氹得觀眾好開心，異性緣亦相當唔錯，而佢另一樣「傑作」就係有個34F索爆女朋友蕊蕊，兩人拍拖將近三年，熱戀期經常唔介意高調晒恩愛，金剛又講過帶蕊蕊返台灣見家長，不過近月兩人屢傳感情有變，雖然佢哋就一直否認，但糾纏多時，金剛終忍痛親證本月初已經正式分手，呢單新聞可謂相當爆！

月初搬離愛巢

近期有電影上映嘅金剛接受專訪，訪問部分內容自然離唔開講吓拍拖，但當問及感情生活，金剛即刻面色一沉，起初唔係咁想回應，經記者再三追問下，佢終於開腔親證佢哋已經喺本月初分手，強調不涉及第三者，但對分手原因就唔係咁想講，只係話有努力挽救過感情，奈何性格不合經常嘈交，金剛終於決定分手，本月初已經搬離愛巢，劃清界線。

拍拖八個幾月就有問題

金剛講到分手事件嗰陣，同平時搞笑口花花嘅形象完全唔同，全程非常認真，又不時抖大氣、皺眉同沉默一陣先答，可見佢心情依然好沉重，講到點解同幾時分手，佢就話：「我哋四月頭正式分開，之前成日嗌交，始終大家性格，好多睇法、觀點有分歧，唔想再拖落去。（發生過咩問題？）其實拍拖八個幾月開始有問題，經常因為好小嘅事嘈交，我係好怕嗌交嘅人，成日係咁真係好攰，所以糾纏咗一段時間，依家決定分手。（有冇挽救過？）都有，大家對呢段感情都好認真，但性格嘅嘢好難改，諗住Tune吓大家諗法，但最後都Tune唔到，長此落去大家都辛苦，唔想不斷循環再拖落去。」

唔關第三者事

金剛強調分手絕對唔關第三者事，兩方面都冇第三者，多次強調只係性格不合：「一定冇第三者！大家係和平分手。（邊個提出分手？）係我……（沉思一會）我同佢都係呢個圈嘅人，平時出嚟會成日畀人問對方嘅事，以後大家唔好問我關於佢嘅嘢，依家我哋係朋友。（但前幾日問回應，蕊蕊仲話你係佢男友！）佢點講我控制唔到，我四月頭已經搬開咗，依家搬咗去朋友屋企住，我立場好清楚，亦都同佢表明立場。（抖一下大氣）算啦！大家都冇可能，再落去只會大家傷害大家，本來就係性格問題，好難改變。（之前成日嗌交有冇影響工作？）有啲，工作同感情冇得分得咁開，做嘢嘅心情係有影響，總之希望佢有真正幸福，我會專注番事業。」

最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！

最強娛樂APP「東網巨星」下載連結：

http://on.cc/redirect/entertainment