何浩文勁迷馬明 網民懷疑鴨王變HEHE
20160424
東網電視
更多新聞短片
HEHE～每個蛛絲馬迹網民都睇到，唔畀人懷疑就假啦！
兩位男神馬國明（馬明）同何浩文（Dominic）最近就喺內地為新劇《賭城群英會》拍攝，唔知係咪休息時間太悶，最近愛上拍片放上Instagram同Facebook等社交網站嘅何浩文，成日都以馬明為片中主角，對馬明零舍有興趣喎！
重提爆粗事老尷
一向給人乖乖仔形象嘅馬明，上年畀林敏驄（出賣）喺Facebook上載咗段爆粗短片，聽到馬明把聲話：「26、7點都好X高！」應該講緊收視數字高，當時段短片喺網上瘋傳，成為一時熱話，有網民就覺得林敏驄靠害，但有網民就認為馬明講粗口冇乜大不了，反而夠真性情，對其男神形象冇影響。事隔約半年後嘅噚日，何浩文就喺短片中問馬明：「馬明，你對於26、7點有咩睇法？」坐喺隔離嘅馬明面露尷尬表情話：「其實都好高㗎。」兩人最後都忍唔住笑，尤其發問問題嘅何浩文笑到見牙唔見眼。
日拍夜拍基味濃
其實唔止一次，何浩文近期成日整鬼馬國明，除咗考馬明智力，仲考籃球技術！較早前上載咗段馬明「入樽」嘅短片，片中嘅馬明交足戲大晒英姿，連何浩文都忍唔住親自「執導」，以為好英，將鏡頭影落地下，原來籃球架只係一個人嘅身高咁高，非常搞笑！但係何浩文對馬明特別着迷，有網民思疑何浩文係咪中途轉「基」，愛上咗馬明，如果唔係做咩成日focus落佢度？搞到基味好濃喎！
真名上網反應兩極
另外，何浩文之前用真名喺討論區開Post，同網民大玩 Q & A，但有網民睇唔過眼開Post爆粗鬧佢係「暗星」，引嚟唔少網民入區討論，有人附和「樓主」話佢拍啲戲唔出名，同埋自我宣傳推高人氣，何浩文見此當然還擊啦，不過一向EQ高嘅何浩文就自嘲係奀星，有網民叫佢唔使認真理討論區嘅留言，仲鼓勵佢繼續拍好戲，力撐佢喺演藝圈嘅發展。
網民有話兒：
suxxxxlxx：我以為你會問佢幾時用真名上討論區
xxlyxxxnc：有啲似樣！
xxkxxxxxy：笑點轉移左係（喺）你個哈哈哈哈到
alxxxx_xxt：咩情況呀哈哈哈哈！睇幾多次都覺得好好笑！
X客熊X：佢算唔算賣廣告
最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！
最強娛樂APP「東網巨星」下載連結：