日翻拍韓劇　中島裕翔做冇用打工仔

曾經係日劇界一哥嘅富士電視台，近年劇集收視低迷。今季由著名編劇野島伸司炮製星期日晚9點時段劇集《OUR HOUSE》，雖然天才童星蘆田愛菜擔正，卻輸足同時段TBS電視台、嵐成員松本潤主演嘅劇集《0.1無罪真相》（前譯：99.9刑事專門律師）。

為收復失地，富士宣布由尊尼組合Hey!Say!JUMP嘅22歲成員中島裕翔主演7月新劇《HOPE~零期待的新入社員》。劇集改編自2014年由韓星任時完主演嘅韓劇《未生》，中島裕翔飾演放棄職業圍棋選手夢想，成為一名辦公室打工仔，卻經常犯錯闖禍，劇集將會喺下月初正式開鏡，中島日前拍攝造型照。

中島裕翔早前被爆同大佢廿歲嘅女星吉田羊發展母子戀，睇嚟事務所想用排山倒海嘅工作，逼佢同吉田羊斬纜。