北川景子晒婚照　DAIGO自創求婚歌出CD

今年1月註冊結婚嘅日本女星北川景子和男歌手DAIGO，噚日喺東京嘅高級酒店補辦婚宴，由於DAIGO係日本已故前首相竹下登嘅外孫，所以婚宴上有唔少政經界人士到賀，加上雙方的藝能界好友均有到場，包括與DAIGO亦師亦友嘅樂隊L'Arc~en~Ciel主音hyde、GLAY主音TERU等，逾500名親友出席，場面盛大，據知婚禮場地面積達2,013平方米，樓底高23米，可以容納逾千人。

一對新人喺婚宴上換咗幾套服裝，包括西式及日式婚禮服，婚禮上除咗播放兩人親自出演、講述佢哋認識至結婚嘅短片之外，DAIGO又唱出親自創作嘅求婚歌曲，向景子第二次求婚，令景子當場感動落淚。

而hyde和TERU都有唱歌表演祝賀二人新婚，TERU更將名曲《HOWEVER》的其中一句歌詞改為：「想給景子幸福」。至於2003年合作真人版《美少女戰士》而同景子做咗好姐妹嘅安座間美優、小松彩夏等女星，更與景子合體獻唱，相當熱鬧。婚禮上，日本首相安倍晉三、曾與景子合作影視系列《律政英雄》嘅萬人迷木村拓哉等都有錄製短片祝賀。

婚禮結束後，景子同DAIGO各自更新網誌，除大晒婚紗相之外，亦透露因近期發生熊本地震，一度考慮延期婚宴，不過最後仍堅持低調舉辦婚禮，而DAIGO又放上求婚歌曲嘅CD，搞笑徵詢歌迷應唔應該出碟。