Gin Lee開處女簽唱會　粉絲冧爆送玫瑰

歌手李幸倪（Gin Lee）舉行入行嚟第一個簽唱會，以跌膊衫晒雙肩嘅佢即場孖歌迷大玩遊戲，又表演咗新歌《很想要吧》嘅舞步。現場有好多跟咗Gin Lee多年嘅粉絲，粉絲們仲送咗一大束玫瑰花同埋裝滿咗氣球嘅禮物盒畀佢，又講咗好多感人嘅說話，令到佢非常感動。

拎金唱片就請食飯

Gin Lee表示為咗新歌隻舞練咗一個月，遲啲個小型音樂會就可以睇晒全首歌喇！講到新碟《beGin》僅半個月銷量直逼金唱片，她透露如果真係拎到金唱片就請公司同事食飯：「仲要請Eason（陳奕迅），譚詠麟，Eric Kwok佢哋，我加盟新公司嗰陣佢哋都好支持我。」

孖Eason做聲演情侶

Gin Lee又話嚟緊會同Eason有個廣播劇：「我有首《月球下的人》佢又有首《月球上的人》，Eason開緊巡唱都幫我，佢話好開心十幾年後有個續集。」 Gin Lee仲話今次同Eason係聲演情侶，但Eason個角色就好Cool，她謂：「好彩咋，冇咩甜言蜜語，唔會尷尬。」

爆Eason吹神上身

Gin Lee大爆Eason一休息就吹神上身，成日都要工作人員打眼色叫停佢：「最開心係我送咗隻碟畀佢，佢話已經聽咗，仲話最鍾意我作個首《含蓄》，佢話要唱我首《月球下的人》，咁我要練定佢首《月球上的人》先。」