胡定欣單立文孖住喺核心內圍睇黎明

天王黎明（Leon）連日來喺中環海濱舉行4D騷，除咗吸引大批歌迷到場支持，撲唔到飛嘅就轉到「核心外圍」聽騷，而一眾星級藝人都有捧場，認真魅力沒法擋！而藝人胡定欣就撇甩男友陳明道，尋晚孖住單立文夫婦睇騷，之後仲喺後台同Leon「集郵」成功，定欣亦喺Instagram大晒合照，並興奮地留言：「It's happening...Thank you Leon!」羨慕死唔少人！

定欣之後仲上載一條短片，出賣「老竇」單立文添！片中Leon唱緊《夏日傾情》，場內觀眾包括單立文都一齊大合唱，氣氛相當之好！但定欣唔單止拍下「老竇」投入合唱嘅一刻，仲喺佢背後做出多個搞鬼表情兼「咪嘴」合唱，認真搞笑！完全唔知被人整估嘅單立文，仲心情靚爆地分享與黎明嘅合照，並留言：「識睇一定睇Leon！」