【Follow咗未？】倪晨曦升呢零瑕疵女神

現年28歲嘅模特兒倪晨曦（Elva），入行多年嘅佢，近日做咗美容公司代言人，之前就為咗個廣告影咗輯硬照，雖然冇露「事業線」，只係露出一對修長嘅美腿，不過竟然成功引起網友嘅注意！再加上識得兩文三語（講普通話同英文仲好流利）嘅Elva，早年仲加入now做主持，而本身教開瑜伽嘅佢，網友又發現佢而家喺ViuTv教瑜伽，仲不時着住背心仔咁整出難度高嘅動作，雖然只係微露出少少「事業線」，不過網友都話已經夠晒滿足，大讚佢有仙氣，係「遲來的女神」！

網友對有興趣嘅嘢，真係點都唔會放過！唔少網友化身「人肉搜尋器」，即刻起Elva底！離開咗模特兒公司嘅Elva，依家已經做咗Youtuber，教人化妝、美容同分享自己嘅所見所聞！教得化妝緊係唔少得要素顏上陣，Elva當然冇有怕，喺鏡頭面前素顏示人，網友大讚佢係冇P圖嘅情況之下，完全係零毛孔、零瑕疵，仲要皮光肉滑，真係令人好羨慕呀！

除此之外，Elva原來入行前，喺2005年參加過多倫多華裔小姐，仲拎埋冠軍，之後第二年就嚟香港參加2006年華姐比賽，而香港代表就係葉翠翠（唔知大家有冇印象？），可惜佢三甲不入，之後就返咗加拿大繼續讀書，畢業之後先係嚟香港發展簽約模特兒公司，發展佢嘅模特兒事業。有網友話Elva生得咁靚，點解會三甲不入，紛紛咁替佢感到不值添！

而喺呢個科技發達嘅年代，每人都肯定有instagram，用嚟睇下朋友有冇更新近況，仲有梗係用嚟Follow吓明星啦！Elva個IG有成35萬個網友follow，個個都大讚佢夠貼地夠真，點解呢？因為佢Upload大部分嘅相都係素顏照，生活照同瑜伽照囉！唔信？《東網》精選幾張畀大家，等大家慢慢欣賞喇！

網友有話兒：

mxxx：集集都有睇ELVABB

行xx肉：我覺得選贏華姐果（嗰）排有仙氣過依家

黃xx：17歲選華姐果（嗰）時已經超靚

100分xx：佢真係靚到，笑個（嗰）時係有陣仙氣散出黎（嚟）。