【廢青變男神】網友分析黃子華成功之道

「一個人冇夢想同條鹹魚有咩分別？」呢句說話鼓勵人要有夢想，但就忽略咗當一個有夢想嘅人喺未成功之前，往往被旁人認定為冇用嘅「鹹魚」。而呢種「鹹魚」，現世代可能會稱之為「廢青」，表面上係指頹廢、不務正業、一事無成嘅青年人，帶着貶義意思，但實際上，可能係指一班敢於追夢、不顧「錢」途嘅青年人。

被嘲正宗「死廢青」

最近有網民開Post，「嘲笑」即將舉行舞台劇嘅男神黃子華，其實昔日都係一名「廢青」！網民仲話佢：「死廢青學人追夢！」，不過「廢青」總有出頭天，最後子華憑個人才華，終於成為依家嘅「棟篤笑始祖」兼人人力捧嘅男神！

昔日「廢青」生活被起底

網民仲一一分析子華昔日嘅經歷，證明佢當時真係一個名副其實嘅「廢青」！例如子華曾喺節目《志雲飯局》中講過，細細個因為貪玩，同幾個同學仔偷咗人哋隻舢舨出海，因而留有案底。大個咗之後，有性格嘅子華揀咗科哲學嚟讀，但旁人就覺得哲學係「搵唔到錢」、「冇前途」，笑佢揀呢科讀。結果子華24歲先至大學畢業，點知後來每份工都做唔長，包括代課老師、物流經理、DJ、資料搜集員、臨時演員、電視台PA……仲唔係「廢青」？網民仲踩多腳恥笑話：「原來佢真係正宗嘅死廢青！」

成功在於有內涵

不過，最後子華都榮升為男神，並唔係因為佢靚仔，而係憑住佢一份出眾嘅內涵！網民話：「一個人未成功之前都係廢青！」然後舉出例子，包括曾坐過監、飾演《Iron Man》嘅荷里活巨星羅拔唐尼（Robert Downey Jr.）等等，每人背後都有個奮鬥成名嘅勵志故事！所以話「莫欺少年窮」，只要有堅守信念，「廢青」都可以有出頭天！

網民有話兒：

溫x漿：一個人未成功之前都係廢青

贊x斯：讀哲學就係廢青？咁李小龍一定係

眾xx知：有外國大學讀都叫廢青:-(

贊xx：當年24歲先讀完大學畢業返香港（仲要係讀哲學），返到嚟仲要做乞食工

焦x：讀哲學嘅人係諗嘢深入啲，一般人冇呢個能力

最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！

最強娛樂APP「東網巨星」下載連結：

http://on.cc/redirect/entertainment