劉家豪回巢連開兩劇提攜新人

金牌監製劉家豪在將軍澳電視城出席《2016年上半年度傑出員工頒獎典禮》。問到「金牌監製」劉家豪何時會有新劇推出？他說：「啱啱返嚟公司，依家都喺度組織緊人手，嚟緊會開兩套四十集劇集，一套係時裝劇《溏心3》，另一套係古裝劇《深宮計》，依家都係寫緊劇本，預計都要七、八個月之後先會開工。（原有演員拍攝？）大部分係，但係有啲又離開咗，都要提攜新人，琴姐（李香琴）依家身體狀況都拍唔到啦。（傳聞敖嘉年自薦？）我唔開名講，有好多演員都話想參與，對我同梅小青係打咗枝強心針。」

問到回無綫後同曾勵珍平起平坐？劉家豪刻意避談：「唔好講呢啲，大家都係想提高個水準，拍好啲劇，唔應該去比較，珍姐都好努力。要好多謝梁乃鵬先生（電視廣播有限公司前行政主席、現任香港中文大學校董會主席），四年前走又歡送我哋，返嚟又歡迎我哋，好暖。（拍劇製作費係咪大啲？）睇需要，最緊要係劇本，劇本係一劇之本，劇本唔好冇用，用錢係堆砌唔到。（唔夠小生花旦？）唔係，唔可以咁講，TVB一樣有咁多劇開緊，後面啲梯隊上緊。（會唔會搵巨星外援？）主要用番原有演員先，睇角色有冇需要先再作安排。」